Dembele hoin PSG an kal fal

Paris Saint Germain chuan Ligue 1 nomawi an kawl lai humhim turin kawng dik an zawh zel - Zirtawpni zan khan Ousmane Dembele-a goal hnih hmangin AS Monaco chu 4-1 in an hneh.

Inkhel ṭan hmain coach Luis Enrique (2027), right back Achraf Hakimi, midfielder Vitinha leh left-back Nuno Mendes (2029) ten contract thar an ziah thu puan a ni a, phochhuah niin Parc des Princes chhungah thawm a ṭha hle.

Minute rukna lekah midfielder Vitinha chuan goal a khung ṭan a, mikhual Monaco lamin chawlhlawk hmain Denis Zakaria hmangin a sut, ani hian Soungoutou Magassa-a ball pek chu angle zim tak aṭangin a khung.

Second half erawh PSG lam chan vek a ni tawh thung - Napoli aṭanga an lak thar Khvicha Kvaratskhelia chuan Paris club tana a goal hmasa ber khungin, a tawp lamah Dembele chuan goal hnih khung belhin an elpui an sawp thei a ni.

Kum hnih daih contract ziak thartu Luis Enrique chuan, "Paris ka nih ni hmasa ber aṭang khan thlawpna ka dawng ṭha em em a, tum thuhmun kan neih chu mellung pawimawh phun a ni. He hmunah hian eng chena rei nge ka awm zel dawn hre lo mah ila, sulhnu ṭha thei ang ber hnutchhiah ka tum," tiin a sawi.

PSG hian Ligue 1 nomawi chu an chawi leh mai a rinawm, an duh ber Champions League lam an hawi zui leh dawn a, Ningani zan hian last 16 playoff khel turin Brest an lenchilh ang.