Match hmasa berah Davis a inhliam

Anthony Davis chuan a club thar Dallas Mavericks tana a match hmasa berah hliam a tuar a, an khingpui Houston Rockets chu 116-105 in hneh tho mah se a inkhel tluan ve thei lo.

Kum 31 mi Davis hian hmanni deuh khan Los Angeles Lakers aṭangin Mavericks hi a pan, a chhuah chhan hi NBA All-Star Luka Doncic man atan a kal tel vang a ni a, rin loh takin a khelhna hmun a sawn thut.

Nimin zing inkhelah hian court chhungah minute 31 chhung hun a hmang a, hetih chhung hian point 26 a neih bakah rebound ṭum 16 lain a ṭhiante basket neih tur vawi sarih a siamsak bawk.

Quarter thumna an khelh laiin Davis hian Alperen Sengun-a dunk tum chu a lo dang a, hliam tuar in a khelh tluan theih loh phah a ni. Davis bakah hian Mavericks tan Klay Thompson leh Kyrie Irving te chuan point 13 ve ve neiin an thawhhlawk hle bawk a ni.

Kum 31 mi Davis chuan, "Ka ke kha duh angin ka hmang thei ta lo, inkhelh zui duh viau mah ila a remchang lo, ka dinhmun erawh ngaihtuahawm ka ni lo," tiin a sawi a, a chawlh chen tur hi tih chian a la ni lo thung.