Juve leh Milan an chak

Italian team ṭha pahnih Juventus leh AC Milan te chuan Inrinni zan khan an khingpui ve ve an hneh a, Serie A nomawi beiseina an la neih chu an vawng nung zel.

Allianz Arena-a inkhelah Juve hian kai thar Como hneh turin vanneihna an mamawh. Randal Kolo Muani goal khung chu Assane Diao-a'n a sut a, hun tawp dawnah Kolo Muani hian penalty aṭangin 2-1 a chakna goal a khung hram.

Serie A table-a palina ni mek Juve manager Thiago Motta chuan, "Como hi hmachhawn an awlsam ngai lo, tun ṭumah pawh khan hnehna kan chan theih dan tur kawng hrang hrangin kan bei, a tawpah chuan kan hlawhtling hram.

"Kolo Muani khelh dan khan min ti lawm a, goal a khung bakah a ṭhiante tan a ṭangkai em em bawk, chutihrualin tun aia ṭha zawk pawh khan a la khel thei," tiin Paris Saint Germain aṭanga an lakluh France international chungchang a sawi.

Inkhel dangah AC Milan chuan 2-0 in Empoli an hneh bawk - Milan defender Fikayo Tomori chu minute 54-naah hnawhchhuah a ni a, a tlem zawk an nih hnuah Rafael Leao leh Santiago Gimenez te hmangin goal an khung zawk ta tho a ni.

Milan hian season an hmang ṭha tawk lo a, an tan Serie A nomawi chu beisei bo la ni chiah lo mah se kawng erawh a la inhawng, a chhe berah season thara Champions League khel phak chinah tal awm an tum ang.