Man Utd tlarhma a bil, tlarhnung a pawp

Manchester United-in Inrinni zan khan Old Trafford-ah tun season-a an Premier League match hmasa ber an khel a, Crystal Palace lakah 3-1 in an mualpho. 

Mikhual Palace tan Andros Townsend-a'n goal hmahruai a khung a, Wilfried Zaha-a'n a club hlui lakah goal hnih a khung bawk.

United goal awm chhun hi player thar Donny van de Beek-a khung a ni a, 2-1 ni hman mah se chak phu zawk Eagles-in harsatna nei loin hnehna an chang.

Ole Gunnar Solskjaer-a'n pathumna ni nawn turin hmabak a ngah a, an match hmasa bera an khelh dan thlirin Champions League khelh phak pawh a harsa ang.

Europa League semifinal an thlen avangin Manchester United-in chawlh an nei a, Sevilla an hneh loh hnuah chanchin duhawm lo hlir an hria.

Transfer-a an lakluh duh ber Jadon Sancho lalut tawh tura an inngaih hnuah a tlawlh a, Greece ramah Harry Maguire-a'n buaina a tawk a, England tana fehchhuahnaah Mason Greenwood a mualpho a, Paul Pogba-a'n Covid-19 a vei a, Aaron Wan Bissaka-a'n Dubai-ah chawlh a hman avangin ni 14 chhung quarantine a tawk.

A chunga tarlan zawng zawng khaikhawmna chu Premier League season ṭan turin United an la inpeih lo a, Crystal Palace chu awmze neiin an nawr thei lo a, an tlarhnung a buai bawk.

Minute 7-na lekah Jeffrey Schlupp-a'n United defender Victor Lindelof tlan pelin a ball cross chu Townsend-a'n goal-ah a chantir.

Eagles manager Roy Hodgson hi kum 73 mi a ni a, mual sira inkhel entu Sir Alex Ferugson aiin kum nga chauhin naupang mah se a naute a la hui khawm ṭha hle. Hodgson hian defence pali bakah midfielder pali dang chu defence hna thawhtirin defence thuah hnih a hmang a, forward pawhin goal venhim hi pui mah se defence hlawm hlak an ni lo. Palace hian Wilfried Zaha hmangin United tlarhnung an rum ṭhaih reng a, 24% lek ball chang chung siin goal hlauhawm an ngah zawk.

United chance neih chu box pawn aṭanga Scott McTomminay leh Bruno Fernandes-te pet a ni a, Palace keeper Vicente Guaita an tibuai pha lo.

Second half-ah Solskjaer-a'n Greenwood luhtir mah se United tlarhnung an buai zawk a, Jordan Ayew pet fuh tawk loh chuan Lindelof kut perin VAR rawn a nih hnuah Palace-in penalty an hmu. Spanish keeper De Gea-a'n Jordan Ayew pet dang mah se goalline a pelh avangin an pet ṭha leh a, Zaha rawn ding chhuakin chiang zetin minute 74-naah a pet goal.

Greenwood-a'n United chance neih ṭhat ber khawhralin goal zawnah a tauh lut thei lo a, substitute Donny van de Beek-a'n minute 80-naah ṭha zetin goal a thun a; nimahsela Minute 85-naah Zaha-a'n Lindelof bumin chak nemnghehna goal a khung.

Lindelof tihsual a langsar a, defender manto Harry Maguire-a'n hming chhiatna hranpa nei lo mah se a man zat leh a khelh dan a inphu lo.

Paul Pogba-a'n midfield-ah tihsual a ngah a, Fernandes-a'n tihṭhat a ngah chuang lo. Tlarhma lama awm Anthony Martial, Marcus Rashford leh Daniel James te hnathawh an bo tluan chhuak a; anni pathum bakah Greenwood leh substitute Odion Ighalo ten goal zawnah an pet miah lo!

United boss Solskjaer chuan, "Kan khel ṭha tawk lo a, kan khingpuite khan point hmuh an phu. Ka naute hi hetiang ang hian an khel ngai meuh lo a, chuvangin kan in enlet a ṭul. Tun aiin kan khel ṭha thei a ni," tiin a sawi.

Solskjaer tana chanchin lawmawm awm chhun chu player thar Van de Beek-a'n goal khungin bul a ṭan a, chutih rualin hnehna an chan loh avangin Ed Woodward lakah a pangchang sawt ang.

United hian left back leh right winger bakah centre back lak an la tum nia sawi a awm a, tun dinhmuna thawm ring ber chu Porto left back Alex Telles a ni.