Aguero tel lohna Manchester City

Manchester City chuan zanin dar 12:45 hian Molineux Stadium-ah Wolverhampton Wanderers an hmachhawn dawn. Wolves hian an match hmasa berah Sheffield United 2-0 in an hneh a, Nuno Espírito Santo naute hi game mawi leh hmuhnawm an khelh ṭhin avangin Pep Guardiola hote hi chak tura rin ngawt a fuh lo ang.

Pep Guardiola chuan, "A nat hlim pawh khan a hliam na tih kan hre nghal a, tun thlengin kan zingah a la training lo. Sergio hi ngai awh leh vat chi a ni lo a, chuvangin thla hnih khat a la chawlh a ngai dawn," tiin a sawi a, Aguero hian Wolves lo pawh club dang a hmachhawn dawn lo nual  tihna a ni. 

Argentine striker Aguero thlakna Gabriel Jesus-a'n match hnuhnung 12-ah goal nga a khung a, Brazilian forward hian mawhphurhna a la zo tawk loa ngaitu an tam hle. Jesus hi bench-ah a awm dawn a nih chuan 'false nine' hna chelh turin Raheem Sterling a awm thei ang. 

Man City hian player thar Ferran Torres an nei a, ani erawh mual sira che tla chi niin Premier League atan a ṭha tawk ang em tih hriat la ni lo. Chutihrualin Pep Guardioal hian ṭha tih nemngheh sa Kevin De Bruyne a nei a, Belgian midfielder khelh ṭhat ṭumah chuan Man City dan an harsa dawn.

Chutihrualin an khingpui tur hi Wolves an ni tih theihngillh loh a ṭha, season liam ta khan Nuno Espírito Santo hote hian league-ah Man City hi ṭum hnih an hneh a ni.