Mizoram zinkawng a tawp

National Games 2025 hmeichhe hockey huangah Mizoram zinkawng a tawp. Nimin khan Mizoram hian an pool match hnuhnung ber an khel a, tlang tura chak mai bakah goal thum tala chak an ngaih laiin Maharastra lakah 4-3 in an vanduai.

Goal mamawh Mizoram hian Marina Lalramnghaki hmangin quarter hmasa berah an khung nghal a, chawlhlawk thlengin hma an hruai. Mahse, quarter thumnaah Mizoram an tlusawp, goal li ngawt an chhuah!

Quarter hnuhnung berah Mizoram hian na takin an bei let. Marina-i leh Lalruatfeli hmangin an khung belh a, beiseina insiam leh mah se hunin a daih tawh lo, point li nen pool match an khar a, National Games an khelh hmasak berah knockout stage an lut phak ta lo.

Mizoram coach Lalroṭhuami chuan, "Kan nauten theihtawp an chhuah a, an khel chhe lo bawk. Pool match ṭhenkhatah thutlukna dik lo kan tuar a, a tawpah a pawi ta a ni, chutih rualin a vawi khat nana National Games kan khel phak hi a lawmawm," tiin Vanglaini a hrilh.

Hmeichhe hockey huangah hian semifinal khel tur a chiang tawh. Maharastra leh Madhya Pradesh te an inkhel dawn a, semifinal lehlamah Jharkhand leh Haryana ten final luh an inchuh ve thung dawn a ni.