Hmahruaitu Napoli an chelh

Napoli chuan Serie A hmahruaitu an nihna sawhngheh zual theihna remchang an nei a, mahse an khingpui Udinese nen 1-1 a an inhnehtawk avangin champion lai Inter Milan an kalsan hla thei rih bik lo.

Pathianni zan Diego Maradona Stadium-a inkhelah, mualneitu Napoli tan midfielder Scott McTominay chuan minute 37-naah goal a khung a, goal an neih aṭanga minute thum lekah Udinese lamin Jurgen Ekkelenkamp hmangin an sut, goal dang lut zui loin an inhnehtawk.

Naples club hian Serie A match 24 aṭanga point 55 hmuin hmahruaitu chu an ni zel tho, pahnihna Inter Milan aiin point liin an sang zawk - nizan khan Inter an inlan a, an chak a nih chuan an inkar hi point khatah a zim ang.

Napoli manager Antonio Conte chuan, "Dinhmun sang zawkah hun rei vak lo chhung kan ding zuai a, mahse kan awm rei lem lo. Udinese khan min beihlet dan tur an hre chak em em a, kil tin aṭang khan kan chak lohna laiah zel min bei ni maiin ka hria.

"A nihna takah chuan match khelh tur a tam a, player ngai hlirin minute 90 chhung khelh reng chu a harsa ve bawk. A pawi ber lai chu goal khung theihna remchang kan insiam tlem lutuk kha a ni. Udinese khan tharum an ngah a, an thiam hle bawk," tiin a sawi.

Italian manager Conte enkawl Napoli hian tun kar tawp hian palina ni lai Lazio an lenchilh zui leh nghal dawn, inkhel hautak a ni ang.

Pathianni zan Serie A inkhel dangah AS Roma chuan Venezia chu 1-0 in an hneh a, goal awmchhun hi Paulo Dybala-a'n minute 57-naah penalty aṭanga a khung a ni a, table mawngphah lama talbuai ṭhin Roma kha tunah chuan pakhuana an ni ta.

Roma coach Claudio Ranieri chuan, "Ka naute khan inkhelah an rilru an pe a, a tir aṭanga a tawp thleng theihtawp chhuahin an bei. Khelmual chhungtah tute pawh lut ni se la a pawina a awm lo, a pawimawh lai chu theihtawp chhuah a ni.

"Serie A match ṭha taka kan khelh hian inelna dangah pawh nghawng ṭha a nei thei ngei ang, tunah chuan FC Porto nena Europa League kan khelh tur atan rilru kan seng leh nghal thei tawh ang," tiin a sawi a, tunlai an boruak neihah a lungawi hle.

Inkhel dangah Lazio chuan Monza chu 5-1 in an sawp a, season thara Champions League khelh ngei tumin hma lam an pan zel, palina niin an chunga awm Atalanta an phak lohna chu point nga a ni.