Rotterdam Open champion Alcaraz

Carlos Alcaraz chuan hmun hrang hrangah a inkhel thiam tih a takin a lantir - Pathianni zan khan Alex de Minaur hnehin Rotterdam Open nomawi a chawi.

Spanish star hian indoor hardcourt title hmasa ber la tur hian 6-4, 3-6, 6-2 in hnehna a chang a, tennis a khelh hun chhunga nomawi 17 a lak tlinna a ni ta chiah bawk.

Kum 21 mi Alcaraz hian awlsam takin hnehna a chang tlang mai bik lo, set hnihna a hloh a, a tawpah erawh a chungnung ta zawk. Nikum September thla khan Beijing-ah a hlawhtling a, a hmu lamah a champion lehna hmasa a ni hial.

Grand Slam vawi li champion tawh Alcaraz chuan, “Ka tan chuan chawlhkar nuam leh chhinchhiah tlak tak mai a ni a, hun rei va tak hnua ka champion lehna a nih avangin a lawmawm zual. Inrintawkna bakah beiseina thar min siamsak ngei ang,” tiin a sawi.

Tun dinhmunah Alcaraz hian French Open leh Wimbledon title a kawl mek a, tun hma lamin US Open nomawi a lo chawi tawh bawk - clay, grass leh hard court-ah nomawi lian a chawi vek tawh a, a inkhel thiam kual vek tihna a ni.

De Minaur erawh a la vannei rih lo, season hmasa khan Rotterdam Open final a lut tho a, mahse nomawi inchuhna inkhelah Jannik Sinner a ngam lo, kuminah a vanduai zawkah a tang nawn.

Australian tlangval De Minaur chuan, “Ka inkhelah khan hmasawnna hmuh tur tam tak a awm, chutihrualin tun aia ṭha lehzual zawkin ka khelh a ngai tih chu a chiang a ni,” tiin a sawi. Kum 25 mi De Minaur hian ATP tour title pakua a la tawh a ni.

Tennis inelna dang Dallas Open lamah Denis Shapovalov chuan Casper Ruud chu 7-6 (7-5), 6-3 a hnehin, tennis a khelh tawh china a nomawi hlu ber a chawi a, atan chuan hun duhawm leh chhinchhiah thlak tak a ni ngei ang.

Texas-a inelna neihah hian, champion tura a kalkawngah Shapovalov hian seeded pakhat a Taylor Fritz leh seeded pathumna Tommy Paul te pawh a paltlang a ni.