Adana Demirspor an chhuak tau!

Pathianni zan Turkish Super Lig inkhelah Adana Demirspor chu an penalty chawi danah an lungawi lo a, hun tawp hmain khelmual an chhuahsan - engtin nge an awm zel dawn tih erawh hriat a la ni lo.

Adana Demirspor hi Galatasaray nen an inkhel a, league hmahruaitu Galatasaray hian minute 12-naah goal an khung. An player thar Alvaro Morata chuan penalty aṭangin goal a khung.

Inkhel an chhunzawm a, manager Mustafa Alper Avci chuan a naute a ko khawm a, engthu nge a sawi chu hriat ni chiah lo mah se a hnu rei loteah Adana Demirspor player zawng zawng chuan khelmual chhuahsanin dressing room an pan.

Match referee pawhin khelmual a chuahsan a, a hnuah inkhel chu tihtawp lailawk a nih thu an puang. Adana Demirspor vice president Metin Korkmaz chuan an lungawi loh chhan chu Galatasaray ni loin, referee board chungah a nih thu a sawi.

Sancak chuan, "Khel tluan pawh ni ila, thil chiang pakhat a awm, chu thil chiang chu kan chak dawn lo tih hi 99% in a sawi lawk theih," a ti a, inkhel enkawltute chungah rinna an nghat ngam lo.

Match chungchanga thutlukna siamtu tur chu Turkish Football Federation an ni dawn a, nimin tlai thleng kha chuan an thutlukna an la puang lo - khelh chhunzawm tur nge chak lo zawka puan tur hriat theih a la ni lo.

Galatasaray manager Okan Buruk chuan, "Hetiang thil hi chu rilru thianghlim tak aṭanga tih a ni thei lo, hetiang thil hi chu Turkish football hmai ti baltu a ni," tiin an khingpui lam a dem.