Mizoram Premier League khel turin Khaw 50 chuang aṭangin player an fuan khawm
Mizoram chhunga football inelna sang ber Mizoram Premier League chu September 1 zan hian Lammualah khelh
ṭan a ni dawn ta. MPL khel turin khaw 50 chuang hret aṭanga player an fuan khawm avangin Mizoram pum huap inelna a ni tih hnial rual a ni lo a, India ram ang pawhin a chhuanawm hle a ni.
MPL Season 5 ṭan hmaa I Day Football leh MFA Super Cup a awm avangin kum dang zawng aiin club-te inpuahchahna a ṭha a, registration tih fel tawh hnuah Mizoram Football Association-in loan hmanga player pali lak a phal avangin club-ten inelna ṭan tak tak hmain an chak lohna lai thuam ṭhat theihna hun ṭha an nei bawk.
Champion lai Aizawl FC-in season
ṭan hma inelna pahniha an champion leh avangin nomawi chawi leh tura rinkai an ni a; amaherawhchu champion tura an kalkawng thlirin an chungnung bik lo.
Mizo zinga I League khel hmasa ber club hian Durand Cup khela Delhi lama an zin chhuah avangin MPL-ah club dang aiin chawlh hun an nei tlem dawn a, an defender pawimawh Lalruatthara'n ISL club Delhi Dynamos a zawm dawn bawk avangin AFC hmabak hi a khirhkhan hle.
Engpawh chu ni se MPL club Aizawl FC-in Durand Cup-a an match hmasa berah Goan club ṭha Dempo SC 3-1 in an hneh thei a, Mizo club-te India ramah an zahpuiawm lo tih chu hriat loh theih pawh a ni ta lo.
Mizoramin India ram club ṭha zinga chhiar theih tur club a kawl ve ta a, state pawn aṭangin coach hrang hrangin MPL kaltlangin player an zawng ve reng bawk. Mizorama football league sang ber hi a zahpuiawm loh chuan player-te pawh an nep lo tihna a ni a, khawi veng/khua in nge player thawh tam tih hi inzir chiang teh ang.
Khaw 50 chuang
MPL club hian player 30 an ziah luh theih bakah an club hnuaia Under 18 player chu senior team tan an khelhtir thei bawk. MPL club pariatte hian player 30 an ziaklut vek lo a, MPL5 Handbook-ah chuan player 218 hming a chuang.
Aizawl FC-in Bright Middleton Mends an nei a, Ghanaian forward chiah hi foreign player awm chhun a la ni. MPL boruak a sang chho ang a, loan hmanga foreign player a lak theih bawk avangin season tawpah chuan pakhat chauh a ni lo ang.
India ram state dang aṭangin player pakhat tho ziah luh a ni a, Chhinga Vengin Joy Mrona Khar Raswai an kawl. Shillong Lajong tan pawha khel tawh Khasi midfielder hi MPL tihausatu pakhat a ni thei ang. State pawn player lalut tura sum sen a ngaih tam bakah Mizo player-te an ṭhat tawh avangin season dang ang thoin MPL club-te'n player zawng turin India ram hmun dangah chuan an mit an len tam lo ang.
MPL player tam zawk hi chu Aizawl khaw chhung veng 46 (player 117) zet aṭanga thlan khawm an ni a, Aizawl khaw pawn khaw 50 zet aṭangin MPL khel turin player 99 an fuan khawm bawk.
Khaw 50
Lungleiin player 10 an thawh a, khaw dang Champhai (9), Kolasib (9), Khawzawl (6) leh Sihphir (6) ten an hlat lo. Hmunhmel-ṭha tlangval Lalruatthara hi Champhai anga chhiar tel a nih chuan Lunglei leh Champhai player thawhzat hi a inang ang.
India team-a player pahnih Jeje Lalpek-hlua leh Isaac Vanmalsawma te thawh thei khua Hnahthialin MPL-ah player pathum an thawh, Lengpui player pali thawh zingah I Day Football khelh zawh taka best midfielder Rohmingthanga a tel. Khaw hrang hrangin football hmangin India ram thlengin an khaw hming an vawrh lar a, Mizoramin Mizo tlangvalte hmingṭhatna an tel ve bawk.
Khaw tam takin player pakhat chauh thawh mah se player ṭha bik an thawh chuan an khaw hming a langsar ṭhin. MPL4-a thil thleng langsar tak chu Kelkang tlangval Lalkhawpuimawia'n Aizawl FC lama Dinthar FC chakna goal a khung kha a ni.
Armed Veng South leh BVT
Armed Veng South leh Bethlehem Vengthlang ten player pariat ve ve an thawh a, Aizawl khawpui chhung vengah anni aia thawh tam an awm lo.
BVT hian MPL club an neih hma zawngin Mizoram pum huap inelnaah an la champion ngai lo a, NECS Cup hnuhnung berah erawh an champion ta. Armed Veng South hian MPL bakah Aizawl DFA hnuaia division hrang hrang club-ah player an thawh nual bawk.
Veng leh veng inelna lamah Armed Veng an ropui ber a, MPL-ah player pasarih an thawh thei hi thil mak a ni lo. Bawngkawnin player paruk an thawh avangin veng inkhelh thiama chhiar an la ni zel ang. Red Ribbon Football 2012-ah Chanmari Veng an champion a, anmahni ang bawka player panga kawltu Chanmari West FC nen veng leh veng inelnaah tum châkawm an ni lo ang.
MPL khel thei veng 45 zet hi en vang vang la, tualchhung football hrechiang deuh chuan Mizoram pum huap inelnaa champion tawh veng player thawh lo an awm tih a hmuh theih. Veng tam zawkin football-ah hma an sawn a, hmasawn lo an awm tih a hriat theih bawk.
Ni khat chauh
MPL khelh nan ni tam nghah a ngai tawh lo a, naktuk zan hian Zo United leh Bethlehem Vengthlang FC ten match hmasa ber an khel dawn. MPL-ah hian final thlengin match 61 a awm dawn a, mahni veng tlangval emaw khaw tlangval emaw ṭawiawm pahin inkhel hmuhnawm thlir tur a awm ang.
MPL player thawh thei khua/Veng te
Mizoram khaw pawn
Ghana 1
Shillong 1
Aizawl khaw pawn
Khua Player zat
Lunglei 10
Champhai 9
Kolasib 9
Khawzawl 6
Sihphir 6
Lengpui 4
Hnahthial 3
Mamit 3
Siaha 3
Kawnpui 2
Thingsulthliah 2
Tlangpui 2
Vanchengpui 2
W.Phaileng 2
Biate 1
Bilkhawthlir 1
Dampui 1
Darlawn 1
Hmunhmeltha 1
Hnahlan 1
Hriangtlang 1
Hualngohmun 1
Kanhmun 1
Kawrtethawveng 1
Kelkang 1
Khawbung 1
Khawhai 1
Khawkawn 1
Khawlailung 1
Khuangthing 1
Lamzawl 1
Lawngtlai 1
Lungchhuan 1
Melriat 1
Muallungthu 1
N.Lungpher 1
N.Mualcheng 1
New Serchhip 1
Pangzawl 1
Rullam 1
Samthang 1
Sangau 1
Sawleng 1
Sialhawk 1
Thingdawl 1
Vantlang 1
Vaphai 1
Zawlnuam 1
Zawlsei 1
Zokhawthar 1
Total 99
Aizawl khaw chhung
Khua Player zat
Armed Veng South 8
Bethlehem Vengthlang 8
Armed Veng 7
Bawngkawn 6
Chanmari 5
Chanmari West 5
Dinthar 5
Venghlui 4
Durtlang 4
Electric Veng 4
Leitan 4
Ramhlun South 4
AizawlVenglai 3
College Veng 3
Luangmual 3
Ramhlun North 3
Salem Veng 3
Vaivakawn 3
Chhinga Veng 2
Hunthar 2
Khatla 2
Ramhlun Venglai 2
Ramthar 2
Republic VT 2
Zemabawk North 2
Bethlehem 1
Bungkawn VT 1
Chawnpui 1
Chite 1
Chite 1
Hlimen 1
ITI Veng 1
Kanan 1
Maubawk 1
Mission Vengthlang 1
Ramhlun Sports Complex 1
Ramhlun Vengthar 1
Saron Veng 1
Thakthing 1
Tlangnuam 1
Tukual 1
Tuikual North 1
Tuivamit 1
Venghnuai 1
Zemabawk 1
Zonuam 1
Total 117
Note :
1. MPL5 Handbook behchhaha ziah a ni.
2. Tualchhung club-te hian loan hmanga player pali an lalut thei a, player ṭhahnem tak loan hmang veka an chhuahtir theih bawk avangin MPL club-te player kawl dan hi a danglam thei bawk.
3. Player awmna veng/khua hi MFA registration-a an permanent address an ziah dan aṭanga lak a ni.
4. MPL club hian Under 18 player-te chu registration committee hnuaiah senior team zingah register lo mah se inelna neih hunah an chhawr thei bawk.