Saints player manto ber Sofiane Boufal

Southampton chuan an club player manto ber ni turin Moroccan attacking midfielder Sofiane Boufal chu Lille aṭangin pound maktaduai 16-in an lalut a, St. Mary's-ah hian season nga chhung khel turin contract a ziak.

Saints hian kum 2013 khan forward Dani Osvaldo chu an club player manto ber ni turin pound maktaduai 15-in an lo lalut tawh a, Sofiane Boufal hian he record hi a rawn khum ta a ni.

Kum 22-a upa midfielder chuan, "Footballer anga hma-sawn zel ka tumna kawngah Saints hian min puih theih ka beisei a, beiseina sang tak nen he club hi ka zawm a ni," tiin St. Mary's a pan chhan a sawi.

Saints executive director of football Les Reed chuan, "Sofiane hi kan lo enthla reng tawh a, kan club a zawm thei ta hi kan tan chuan a lawmawm hle. Sofiane-a'n hmasawn zel a tumna kawnga kan club a dah pawimawh hi kan tan chuan a lawmawm a ni," a ti.

Ronald Koeman-a'n Everton a pan hnua manager thar Claude Puel enkawlna hnuaia khel Southampton hian season hmasaa an player pawimawh pathum Sadio Mane, Victor Wanyama leh Graziano Pelle te chu pound maktaduai 57-in an hralh a, Norwich City aṭanga Nathan Redmond leh Bayern Munich aṭanga Pierre-Emile Hojbjerg lakluh nan pound maktaduai 22-in an in seng tawh thung.

Hetihlai hian free trans-fer-a Saints zawmtu full back Jeremy Pied chuan a khup hliam vanga zai a ngaih tur thu twitter kaltlangin a puang chhuak a, French defender hian a chawlh hun chhung tur erawh a puangzar lo.