Croatia captain thar Luka Modric

Luka Modric chu 2018 FIFA World Cup khel tur Croatia captain thar a ni. Real Madrid midfielder hian September 5-a Turkey an hmachhawn hunah captain armband a hreng dawn tihna a ni.

Euro 2016 last 16-a Portugal an hneh loh hnuah Darijo Srna chuan ram tana inkhelh a chawlhsan a, coach Ante Cacic-a'n a aiawh tur a ruat chungchang sawiin, "Modric hi kan captain thar a ni a, ani hian player naupang zawkte kaihruai tur leh inkhel thunun turin theihna a nei," a ti.

Croatia hian Turkey bakah hian Group I-ah Finland, Iceland, Kosovo leh Ukraine te an hmachhawn dawn, heng qualifying-a an match hmasa pahnihah hian entu nei loin an inkhelh a ṭul dawn. Nikum lama fan-te chet mawi loh vangin FIFA chuan Croatia chungah hremna a lek kawh a ni. Croatia boss Cacic chuan inkhel entu awm lo mah se buaina an neih phah a rin loh thu a sawi.

Real Madrid midfielder Modric chuan, "Croatia captain thar ka ni hi ka tan chuan chawimawina a ni. Kan inkhelh hmabak pahnihah fans nei dawn lo mah ila a pawimawh ber chu hnehna chan a ni," tiin a sawi. Kum 30-a upa Modric hian ram tan match 93 a khelh aṭangin goal 11 a khung tawh a ni.