China-ah Pellegrini a kal

Manchester City manager hlui Manuel Pellegrini chuan Hebei China Fortune a zawm a, Chinese Super League club-a a contract rei zawng tur leh a hlawh zat puanzar ni lo mah se tun hnaia China football-a sum tam dan ngaihtuahin khawvela manager hlawh hnem pawl a nih ngei a rinawm.

Chilean manager hian league table-a 5-na ni mek club enkawl tur hian Li Tie a thlak a, Everton midfielder hlui Tie hi tun season CSL-a Hebei China hruai thlengtu ni mah se beisei anga a chet ṭhat chhunzawm loh avangin ban a ni ta a ni.

Hebei hian khawvel huap pawha player langsar an kawl nual a, Arsenal winger hlui Gervinho, Chelsea winger ṭhin Gael Kakuta leh Cameroon captain Stephane Mbia bakah chhiah chawi hnu veka kum khata pound maktaduai 23.5 hlawhtu Argentina international Ezequiel Lavezzi te an kawl mek.

Manchester City-a season thum a cham chhunga Premier League nomawi pakhat leh League Cup pahnih chawitu Pellegrini hian September 10-ah a league match hmasa ber a hmachhawn dawn a, Brazilian coach ropui Luis Felipe Scolari-a enkawl league hmahruaitu Guangzhou Evergrande nen an inkhel ang.