Granit Xhaka faktu Arsene Wenger

Arsenal manager Arsene Wenger chuan a midfielder Granit Xhaka khelh dan chuan a tih lungawi thu leh tun hma lama Gunners tan player pawimawh lo ni tawh Emmanuel Petit nen pawha inanna neia a hriat thu a sawi.

Borussia Moncheng-lad-bach aṭanga Arsenal zawmtu hian kartawp Premier League-a Watford 3-1 a an hneh ṭumin a khel ṭha hle a, an khingpuite ball inpe kual tur lo chhu chat-tu leh Gunners game khaikhawtu pawimawh a ni.

Wenger chuan, "Xhaka hian hnai te te a ball in pek leh hla deuha pet dan a thiam, kan team hi team dang zawng aiin ball kan inpe rangin kan inpawt chak bawk. A chang chuan tlar hma lama awmte ball va pe thut thei tur kan mamawh a, ani hi chutiang mi chu a ni," a ti.

French manager Wenger chuan tun hma lama a lo enkawl tawh Arsenal tana season khat a khelhnaa league leh FA Cup nomawi chawi thei Petit nen khaikhinin, "Thahrui a ngah a, a fing bawk. A ṭul a nih chuan centre back-ah pawh a pawh hman theih a, kawng ṭhenkhatah chuan Petit nen khan inanna an nei," tiin Switzerland international laklah beiseina a nei sang hle.

Petit hian kum 1997-2000 chhung khan North London club tan hian match 85 a khelh aṭangin goal kua a khung a, a tirah chuan midfield laia khel ṭhin ni mah se Wenger hian defensive midfielder atan hmangin Patrick Vieira nen a inkawp tir ṭhin a - defender puitu pawimawh a ni.

Arsenal manager hian Xhaka chu kum 24 chauha upa ni chunga khawvela club langsar pawl Moncheng-ladbach captain a nih theih-na chuan hruaittu ṭha a ni zia a tarlang nia a hriatthu a sawi tel bawk.