England captain Wayne Rooney

Sam Allardyce-a'n England manager dinhmun a chelh hnua a squad hmasa ber a puan hnu lawkah England captain atana a ruat tur an inrinsiak a, Liverpool midfielder Jordan Henderson-te hming hial lamrik ni mah se Big Sam-a'n England hruaitu ni turin Manchester United captain Wayne Rooney aia lian zawk a hmu lo.

2018 World Cup qualifier-a Slovakia hmachhawn tur Sam chuan, "Rooney hi a player puite pawn an zah em em a, a pawimawh ber chu eng ang mizia nge a neih tih hi a ni. Ram tana captain armband hren hi thil satliah a ni lo a, mawhphurhna lian tak a ni. Rooney chuan he mawhphurhna hi nuam ti takin a keng a, player tam tak chuan hetiang ang mawhphurhna liantham neih hi an duh lo," tiin ram captain ni tur chuan player huaisen bik nih a ṭul thu a sawi.

Kum 61-a upa manager chuan captain dinhmun sawi chhunzawmin, "Captain chuan khelmual chhungah ṭul a ti a nih chuan team tan thutlukna a siam ṭhin tur a ni. Club captain nih ringawt pawh hi thil hautak em em mai a ni a, ram captain nih phei chu a hautak lehzual a ni," a ti.

Khawiah nge Rooney?

Euro 2016-ah Wayne Roo-ney hi midfield-ah khelhtir a ni a, a khel chhe lo. Manchester United manager thar Jose Mourinho-a'n English striker hi Zlatan Ibrahimovic-a hnung chiahah dahin a khelhtir a, United-a a khelh dan chu a chhawr dan tur a nih thu Sam Allardyce chuan a sawi.

Sunderland boss hlui chuan, "Manchester United-ah Wayne Rooney-a khelhna hmun thlak a ni a, club tana a khelhna hi ka khelhtirna hmun tur chu a ni. Dele Alli pawhin Rooney-a khelhnaah a khel thei a, hei tak hian duhthlan a ti harsa hle a ni," a ti.

Big Sam chuan, "Position tinah hian player pahnih tal duhthlan tur neih zel ka duh a, hetianga kan tih hian kan buai lo ang. Training camp kan neih zawhah inkhel tur kan thlan dawn chauh avangin first XI tur ala hriat theih loh," tiin England player zingah bul ṭan chiang an awm bik loh thu a sawi.

First team pawimawhna

England boss Sam Allardyce chuan squad an lo neih tawh
ṭhinah an club first team tan regular khel phak lo an awm
ṭhin thu a sawi a, player chuan ram tana khelphak tur chuan first team tan ṭha taka a khelh ṭhin phawt a pawimawh thu a sawi.

Manchester United rawlthar duhawm Marcus Rashford-a'n February thlaah club first team tan a match hmasa ber a khel ve chauh a, hetichung hian Euro 2016 squad-ah koh a ni. Big Sam-a'n kum 18-a upa forward hi a squad hmasa berah a ko lo a, fit lo chunga Euro khel tura koh Arsenal midfielder Jack Wilshere pawh a ko lo.

English manager chuan, "Ka hun hma khan club tan pawha regular phak lo leh inkhel tam lote squad-ah koh an ni a, chu chu ngaihtuah ngai tak a ni. Player ka thlan dawn hian season hmasaa an khelh dan, pre-season an hman dan, tun season an hman dan leh kan squad-a in balance theih dan tur ka ngaihtuah vek a, Wilshere pawh hian match a khelh tam tawk loh vangin ka ko lo. Rashford erawh nakina kan la chhawr ṭangkai tur player a ni," tiin a hun hmaa player hmabak tih chhiat a hlauh thu a sawi.

Koh loh hming langsar zingah Ross Barkley a tel a, Everton midfielder hi tun season-ah club tan la inlan vekin goal li a khung tawh. Big Sam chuan, "England a nih miau avangin team ka enkawl tawhah chuan squad thlan harsa ka la tih ber ṭum a ni. Ross Barkley ka ko lo a, he squad-ah hian hmun chan phua a inhria a nih chuan tun aia a thawhrim lehzual a ngai a, amah chauh ni lo England player ka koh loh tam takin hei hi an hriat a ṭul a, ka koh loh vang hian an lungawi lo tur a ni a, chu chuan England tan inelna duhawm tak a hringchhuak dawn a ni," tiin a sawi thiam hle.

Inkhel hmuhnawm

Allardyce-a'n West Ham a enkawl laiin Hammers fan-ten West Ham khelhdan phunga a player-te khelhtir lo tiin an sawisel a, ball kang vawrh nuam ti mi a ni. Mahse, Bolton Wanderers manager hlui chuan England fan-te tan inkhel hmuhnawm tak chhawpchhuah a tum thu a sawi.

A ṭawngkam thiam vanga hriat hlawh manager chuan, "Ka tana pawimawh ber chu hnehna chan leh inkhel hmuhnawm phochhuah a ni a, a bik tak-in Wembley stadium-ah a pawi-mawh lehzual. Ka tan chuan fan-te hlimna thlen hi thil dang zawng aia pawimawh chu a ni," a ti.

Allardyce chuan sawi chhun-zawmin, "A chang chuan hnehna chang turin hmuntin kiltin i dap chhuah a ngai a, i theihna leh thiamna zawng zawng i pek a ngai ṭhin. Hmanni lawka Manchester United-in hun tawp dawna Hull City an hneh ang chi kha ka nuam tihzawng a ni a, kan tawn tam atan erawh ka duh si lo," tiin hun tawp dawna chak chu a thil nuam tih ber pawl a a nih thu a sawi!