Baggies midfielder thar Chadli

West Brom chuan Tottenham Hotspur midfielder Nacer Chadli chu pound maktaduai 13-in an lalut a, kum li chhung an hnena khel turin contract an ziahpui a ni.

Kum 27-a upa mid-fielder hian July 2013 khan Dutch club FC Twente aṭangin Spurs hi pound maktaduai 7-in a zawm a, London club tan inelna hrang hrangah match 119 khela goal 25 khung hmanin tun season-ah erawh Mauricio Pochettino-a enkawl team tan hian a hmel a la lan miah lo.

Belgium international chuan, "Baggies hian team ṭha tak leh manager ṭha tak an neih avangin he hmun ka pan thei hi ka lawm a, game tam thei ang ber hnehna chanpui hi ka tum chu a ni," tiin a sawi.

West Brom coach Tony Pulis chuan, "Player ṭha tak a nih avangin kan team-a kan lalut thei hi ka lawm takzet a ni. Player kan lei chuan kan squad min tichak theitu tur kan lei tur thu ka sawi a, ka thusawi ang chiahin player kan lei a ni," tiin Chadli chuan an squad-ah inelna a hrinchhuah theih a beisei.

Hetihrual hian trans-fer bazar-a thawm nei ve ziah striker Saido Bera-hino chu Baggies-ah a cham chhunzawm a rinawm ta hle. Kum 23-a upa striker hi Crystal Palace leh Stoke City-in lakluh beiseiin dawr tawh mah se Baggies boss Pulis chuan awihawm lo khawpa sum tam thama dawrtu an awm a nih loh chuan English striker hi chhuahtir an tum loh thu a sawi.