Scottish player manto ber Burke

Bundesliga club RB Leipzig chuan Scottish player zinga manto ber ni turin Nottingham Forest winger Oliver Burke chu pound maktaduai 13-in an lalut a, kum 19 leka upa rawlthar duhawm hian football khawvel ngaihven a hlawh nghal.

August thla tir khan Cham-pionship club Aston Villa chuan Fulham aṭangin Scottish striker Ross McCormack chu pound maktaduai 12-in an lalut a, McCormack man zat hi Burke hian a rawn khum a ni.

Kumin March thlaa Scotland-in Denmark an hmachhawn ṭuma ram tana a match hmasa ber kheltu winger hian tun season-ah match sarih chiah khelin goal li a khung tawh a, a tlan chak leh tharum ngah vangin 'Scottish Gareth Bale' tia hminglem pek a ni hial.

Leipzig sporting director Ralf Rangnick chuan, "Burke hi talent
ṭha tak nei, hmasawn zel tura theihna sang tak nei a ni. Player tlan chak leh tharum ngah tak niin a hmasawn zelna kawngah kan pui dawn a ni," tiin an winger thar chungchang a sawi.

Scottish rawlthar duhawm hi Arsenal, Barcelona, Bayern Munich, Crystal Palace, Leicester City, Manchester United, Sunder-land leh Tottenham Hotspur pawhin lakluh tumin dawr mah se Forest manager Philippe Mon-tanier chuan hmasawn zel tura an hnena cham a duh thu a sawi a, mah se German club-in pound maktaduai 13-a an dawr takah chuan club neitu Fawaz Al Hasawi chuan rawlthar dang chher chhuah nan sum chu hman a nih tur thu sawiin an hralh chhuak ta zawk a ni.