Bayern captain Lahm a inringtawk

Bundesliga match khat chiah la khel mah se Bayern Munich captain Philipp Lahm chuan an nomawi kawl lai an humhim theih a beisei thu a sawi leh der tawh!

Club 18 inelna, German league sang ber Bundesliga-ah hian club zawng zawngte an ineltawk nia sawi ṭhin a ni. Amaherawhchu, tun hnaiah Bayern-in league-ah ro an rel a, a zawnin season li chung an champion tawh a ni.

Manager thar Carlo Ancelotti kaihhruaina hnuaiah Bayern hian an match hmasa berah Werder Bremen chu 6-0 in an sawp leh tawh a, champion tur erawh chuan kawng zawh tur a la thui hle.

Germany captain hlui Lahm chuan, "Bayern tana hnehna chan hi tih ṭhanah kan nei tawh a, tunah chuan Munich khawpui tan hian kartawpa Allianz Arena-a hlimna siam hi kalphungah kan neih chhoh zel ka beisei," tiin a sawi.

Tun season-ah chuan season hmasaa an elpui Borussia Dort-mund nen chauh an inel a rin loh thu a sawi tel a, club lian dang Bayer Leverkusen, Borussia Monchengladbach, Schalke leh Wolfsburg te pawh champion thei vek an nih thu a sawi bawk.

Kum 32-a upa Lahm chuan, "Kuminah hian inelna hautak tak kan hmachhawn dawn tih chu a chiang a, club pahnih chauh hi champion tuma inum tur kan ni lo. Mahse kan squad leh manager ka en hian a zawna a vawi nga nan nomawi kan chawi theih ngei ka ring," tiin a sawi.