NorthEast United-ah Zokora a lut

Indian Super League club NorthEast United chuan season thara an marquee player ni turin Tottenham Hotspur midfielder hlui Didier Zokora an lalut.

Sevilla tan a khelh laia Spanish Cup nomawi lo chawi tawh Zokora hian season hmasa khan Pune City captain nichungin Indian Super League hi a lo khel tawh a, Pune club a chhuahsan hnuah club dang zawm nei loin NorthEast United a zawm leh ta a ni.

Ivory Coast tan vawi 123 in-lan-a an ram tana inlan hnem ber mid-fielder hian Sevilla tana a lo khelhpui tawh ṭhin midfielder Romaric nen Highlanders-ah hian hmun pawimawh chan an inchuh ang.

NorthEast United hian striker thar Emiliano Alfaro an lalut bawk a, Lazio tan pawha lo khel tawh striker hian Uruguayan club Liverpool-ah a career a ṭan a, Uruguay tan vawi khat a inlan ve tawh bawk.

Kum 28-a upa striker hi goal khung thei tak niin UAE club ṭha Al Wasl tan 2012-13 season-ah khan vawi 32 inlana goal 23 khungin season hman zawh takah khan a club hlui Liverpool lamah a kir leh a, league match 27 a inlanah goal 21 a khung thei a ni.