US Open Novak Djokovic a chak nghal

Kumina Grand Slam hnuhnung ber US Open 2016 chu nizan aṭang khan first round khelh ṭan a ni a, Rafael Nadal leh Marin Colic ten hnehna an chan hnuah tukin zing khan world number 1 Novak Djokovic chuan a match hmasa ber khelin hnehna a chang nghal.

Seeded pakhatna Djokovic hian darkar hnih leh minute ruk chhungin Jerzy Janowicz chu 6-3, 5-7, 6-2, 6-1 in a hneh. Serbian thiampuipa hi inkhelh laklawh laiin a ban na enkawl a ngai a, hei bakah hian a khingpui hi ATP ranking-a 14-na dinhmun pawh lo luah tawh a nih avangin second round lut turin a thawhrim a ngai hle.

Champion lai Djokovic hian inkhel ṭan hmain a ban rek veilam bakah a ban bul a nawm loh thu a sawi - hei hi Rio Olym--pic aṭang tawh khan a ni. Game ngana an khelh laiin en-kawl lailawk a ngaih phah hial.

Grand Slam vawi 12 cham-pion tawh Djokovic chuan, "Kumtluana ṭha taka khelh reng hi chu a harsa a ni, a chang chuan 100% a dam loh chang kan nei a, chu mi sawi leh chhuanlama hman chu a pawimawh ber lo. Hnehna ka chang a, round sang zawk atan ka inhlangkai thei hi ka lawm hle," tiin a sawi. Djokovic hian second round-ah chuan kumin kum tir lama Monte Carlo-a a hneh loh tawh Jiri Vesely a hmachhawn leh ang.

Nadal a dam

Grand Slam vawi 14 cham-pion tawh Rafael Nadal hi a banrek na vangin French Open aṭangin a inhnukdawk a, Wimbledon-ah a inlan lo bawk. Rio Olympic-ah lo kirin doubles-ah gold a vaw chhuak leh tawh a, tunah US Open-ah a dam chian zia lantirin Uzbekistan star Denis Istomin chu 6-1, 6-4, 6-2 in a hneh lehnghal.

Kum 2010 leh 2-13 US Open champion Nadal chuan, "Inhliam hi chu infiamnain a ken tel ve pakhat a ni a, kuminah hun harsa tak hmachhawn mah ila tun pawimawh ber zawk chu New York-a inkhel theia ka awm hi a ni," tiin a tih ṭhin danin hma hun a eng zawngin a thlir. World number 5 Nadal hi kuminah hian number 3 Roger Federer a inlan loh avangin seeded palina a ni.

Inkhel dang

2014 champion Marin Cilic chuan hard court a hman thiam zia a lantir leh a, Brazil tlangval Rogerio Dutra Silva lakah vawi 12 ace siamin 6-4, 7-5, 6-1 in hnehna a chang.

Seeded pasarihna Cilic hian US Open inbuatsaihna tour-nament hnuhnung Cincinnati final-ah world number 2 Andy Murray hneha champion no-mawi a chawi avangin tun ṭumah pawh hian player enrawn hlawh bikte zinga mi a ni leh ang.

Wimbledon finalist Milos Raonic chuan a service neih
ṭhat zia pholang lehin Dustin Brown lakah vawi 15 ngawt ace a vaw chhuak leh a, darkar khat leh minute 46 chhung lekin German tlangval hi 7-5, 6-3, 6-4 in a hneh. Canadian star Raonic hian second round-ah khawtual tlangval Ryan Harrison a hmachhawn leh dawn a ni.

Barakhaih

Inelna ṭan zana beisei loh result kan hmuh hmasak ber chu world number 84 Kyle Edmund-a'n seeded 13-na leh tunhma lama semifinal hial pawh lo thleng tawh Richard Gasquet 6-2, 6-2, 6-3 ngawta a hneh hi a ni. Kum 21-a upa Edmund hian tennis a khelh hun chhungin hetianga ranking sang player a hneh vawi khatna a ni nghe nghe.

Seeded 20-na John Isner pawh Gasquet hnungzuiin a chesual ve nghal teuh hle. Kum 18 chauha upa Frances Tiafoe lakah set hmasa pahnih a hloh hnuah a tawn hriat neih chhawr ṭangkaiin 3-6, 4-6, 7-6 (7-5), 6-2, 7-6 (7-3) in a lehthal leh hram a ni.

Number 1 a hnai?

Hmeichhe singles lamah Australian Open champion Angelique Kerber chuan a match hmasa berah game khat mah a hloh lo. German nula hian Polona Hercog lakah set khatna 6-0 a lain set hnuhnung zawkah game hmasa ber a la leh a, Slovenian nula hi ke na vanga a inkhelh chhunzawm theih loh avangin Kerber-i'n second round a lut.

Kum 28-a upa Kerber hian chawlhkar 185 chhung zet WTA number 1 ni tawh Serena Williams dinhmun luahlan theihna hun a neih chu Cincinnati Open-ah bawhpelh tawh mah se tun ṭumah erawh hman ṭangkai a tum hle ang.

Kerber chuan, "Mi zawng zawng tan khawvela a sang ber nih chu duhthusam vek a ni ang, a pawimawh ber erawh ka inkhelh hmabak zel a ni a, ranking chu a lo insiam chho ve zel mai ang," tiin a sawi.

Inkhel dangah seeded pathumna Garbine Muguruza chuan inkhel hautak hma-chhawn nghal chungin hnehna a chang thei tho. Spain nula hian Belgian star Elise Mertens chu 2-6, 6-0, 6-3 in a hneh. Rio Olympic champion Monica Puig chuan Brazil-a gold a dawn hnua a match hmasa berah China nula Zheng Saisai chu 6-4, 6-2 in a hneh lo thung.

US Open hi...

Kum 1881 aṭanga khelh ṭan US Open hi a tirah chuan Grass court-ah khelh ṭhin a ni a, kum 1975-1977 inkar khan Clay court-ah khelh niin United States Tennis Association (USTA) buatsaihin kum 1978 aṭang khan chuan Hard court-ah thlak a ni a - tun thlengin hman chhunzawm zel rih a ni.

2016 US Open hi he inelna ṭum 136-na niin nizan aṭanga September 11 thleng khian USTA Billie Jean King National Tennis Center-ah khelh a ni. Kuminah hian mipa leh hmeichhe singles bakah doubles leh mixed doubles hmanga inelna neih tur niin court hrang 17 zetah khelh tur a ni - mipui 23,771 lenna Arthur Ashe Stadium hi an khelhna tur hmunpui ber niin ruah a sur palh pawhin a chung khuh theih a ni.

Hawk-Eye

Kum 2006 aṭang khan US Open-ah hian khawl hmanga endikna (Hawk-Eye) hman a ni a, player ten set khat zelah vawi thum ennawn (challenge) an dil thei a, tiebreak khelh a nih chuan vawi khat an neih belh bawk. Player-in ennawn a dilna chu khawl hmanga a dik tih fianfiah a nih chuan a challenge neih kha a kiam phah lo a, a dik lo a nih erawh chuan a kiam zel thung.

Sum a tam

US Open hi Grand Slam pali zinga lawmmana sum fai tamna ber niin mipa leh hmeichhe singles champion hian $3,500,000 (Rs 23,51,82,325) zel an dawng dawn. Champion hian ATP leh WTA ranking-ah point 2000 an hmuh belh ṭhin a, final-a chak lo zawkin point 1200 an hmu thung ṭhin.