Transfer tawp niah ngaihnawm tur a la awm em?
Manchester United-in khawvel player manto ber ni turin Paul Pogba chu pound maktaduai 89-in Juventus aṭangin an lalut a, Manchester City-in Everton aṭanga John Stones lalut turin pound maktaduai 47.5 zet an sen ngam avangin English defender manto ber record thar a awm bawk. Kumin nipui transfer hi pawisa hman tam ber ṭum a ni dawn a, naktuk zing 3:30 (IST) a transfer a tawp meuh chuan Premier League club-in pound tluklehdingawn khat an sen tlin rin a ni.
Record thar
Premier League club-in tun nipui transfer-a player lakluh nana an sum hman belh khawm chu pound maktaduai 800 a tling tawh a, club-te'n TV rights
aṭangin sum ṭhahnem tak an dawn avangin club tenau zawka ngaih pawhin sum an hmang hnem miau avangin pawisa hman tam lamah record a awm dawn tih a chiang.
Portuguese manager Jose Mourinho chuan Chelsea-in an ban hnuah an hmalam hun ngaihtuahin a club zawm theih tur a zirchiang a, Manchester United a zawm hmaa an mamawh a hriat lawk avangin transfer tawp niah an buai a ṭul lo. United-in Paul Pogba, Zlatan Ibrahimovic, Henrikh Mkhitaryan leh Eric Bailly lalut turin hun an mamawh rei lo a, sum erawh an mamawh tam. Mourinho-a'n team ṭha zawk din turin pound maktaduai 150 tling thuak pawisa a hmang tawh a, transfer tawp niah club ngaihnawm an nih a rinawm loh.
Manchester United hian player lian an lalut tawh lo a nih pawhin player chhuak tur lam a la ngaihnawm thei a, club lian dang pawh an bang lo.
Ngaihnawm chu
Euro 2016-a Germany captain Bastian Schweinsteiger leh Argentina defender Marcos Rojo te Manchester United-a an hmalam hun a chiang lo. Kumin transfer hian loan dan danglam bik siam a ni dawn lo a, chuvangin transfer tawp niah engkim a chiang ve tawh ang.
Arsenal hi transfer tawp ni tingaihnawmtu tur an ni a, an midfielder Jack Wilshere chu khelhna hun tam zawk chang turin loan hmanga hawh theih turin an chhawp chhuak. Season liam taah Gunners tan match thum lek a khel nachungin Wilshere hi England tana khel turin koh a ni a, Euro 2016-ah match thum inlan mah se beisei a pha lo. Wilshere hian tun season-ah bench aṭangin vawi hnih a lut tawh a, khelhna hun tam zawk chang turin kum 24-a upa midfielder hi loan hmanga a chhuah phalsak.
Gunners-in pound maktaduai 52 bawr velin Germany defender Shkodran Mustafi leh Spanish striker Lucas Perez te an la lut dawn a, he thu i chhiar meuh chuan a chiang tawh hial ang. London club-in midfielder Granit Xhaka leh Kelechi Nwakali, defender Rob Holding bakah forward Takuma Asano te an lakluh tawh avangin sum ren vanga sawisel hlawh ṭhin Arsene Wenger pawhin pound maktaduai 100 tling thuak a hmang dawn tihna a ni.
Manchester City-in an duh khawp player an lalut tawh em tih hi zawhna awm thei a ni a, loan hmangin keeper Joe Hart a chhuak tawh. Defender manto Eliaquim Mangala, midfielder Samir Nasri leh forward Wilfried Bony te hi transfer tawp niah club dang chil ti puttu tur an ni.
Liverpool-in pound makta-duai 50 chuang an hmang tawh a, an player lakluh leh tur aiin Daniel Sturridge, Mario Balotelli leh Mamadou Sakho te hi chhuahtir an hreh lo nia an sawi avangin Reds hotute transfer tawp niah an awm mai mai lo ang.
Antonio Conte hnuaia hartharna chang mek Chelsea squad a la chhah tawk lo. Blues hian goalkeeper tih loh chu player an mamawh belh niin a lang. Italian manager hian defender an mamawh thu hi a zep lo a, hun a tlem tawh avangin an duh ang tak player an la lut dawn nge mamawh vangin player awm ang an la lut dawn tih hi zawhna awm thei tak a ni.