Joe Hart-a'n Italy a pan

Manchester City goalkeeper Joe Hart chuan Thawhṭani khan Serie A club Torino-a medical nei turin England camp a chhuahsan a, nimin khan medical hi nei nghalin he thuziak i chhiar meuh chuan Torino player a ni tawh hial mai thei.

Kum 29-a upa Hart hi Manchester City manager thar Pep Guardiola chuan a chhawr duh lo a, club chhuahsan tura zalenna a neih thu a hrilh. Hart hian hun a tep ter tawh avangin a ngheta club dang zawm a tum lo a, Torino-ah hian season khat chhung loan-in a khel ang.

Everton leh Sunder-land nen pawha sawi-zawm hlawh hman keeper hi Premier League club pahnihte hian lak an tum loh thu an sawi avangin Italy lam hi a hawi ta niin a lang. Tun season Premier League-a la inlan lo Hart hlawh hi a tam tham avangin club tenau tan lakluh ngam chi a ni lo a, Manchester City chuan an keeper hi Italian club tan a khel a nih pawhin a hlawh ṭhenkhat an tum sak dawn a ni.