Ballon d'Or: Real chhantu Ancelotti

Real Madrid coach Carlo Ancelotti chuan nikuma Ballon d'Or semna programme an chhim loh chungchang a sawi chhuak a, an club chet dan chu a thlawp tlat thu a sawi.

Nikum October khan football khawvela mimal chawimawina ngaihhlut hlawh ber Ballon d'Or 2024 sem a ni a, mahse, Manchester City midfielder Rodri-a'n a dawng dawn tih an hriat avangin Real hi an kal lo - an player Vinicius Jr-a'n dawn a phu zawka an hriat vang a ni.

Real chet dan hi mi tam takin an dem a, Ancelotti pawhin coach of the year chawimawina a dawn chu a lak theih loh phah. Mahse, King Carlo hminglem an pek coach chuan, "Thutlukna kan siam sualah ka ngai lo.

"Vini khan award a dawng turah kan ngai vek. Rodri pawh player ṭha tak a ni a, amah kan zah lohna a ni lo. Mahse, a hma kumah khan Rodri chuan dawng se a awm zawk ang," a ti!

Kum 2023-ah khan footballer ropui Lionel Messi chuan Ballon d'Or hi a vawi riat nan a dawng a, hemi kumah hian Messi hian Ligue 1-ah Paris St-Germain chu nomawi a chawipui a, Inter Miami pan zuiin, eng inelnaah mah la champion ngai lo club hi MLS leh Mexican club te inelna Leagues Cup-ah a champion pui zui a ni.

Rodri hi 2023 khan City-in treble nomawi an chawi theih nan player pawimawh a ni a, Champions League final-a Inter Milan an hnehna inkhelah goal a khung - nikum khan Euro 2024-ah Spain a champion pui thung.

Hetihlai hian City manager Pep Guardiola pawh ṭawng chhuakin, "Rodri ka lawmpui a, Vinicius pawhin season duhawm tak a hmang a, lawmman dawn a phu ve tho mai thei. Lionel Messi leh Cristiano Ronaldo te pawhin season ṭha tak hmang ve vein, chawimawina dawng turin an inel tawh ṭhin- chutiang chu a ni mai a, he thil hi chu a tawp tawh e," a ti.

City leh Real Madrid hi nizan dar 1:30 khan Champions League knockout playoff-ah an inkhel a, result kan hre hman lo.