Felix-a'n Milan-a cham a pawi ti lo

Season tawp thleng atana loan-a AC Milan pantu Joao Felix chuan, Italian club chu loan-in zawm mah se cham zel a pawi tih loh thu a sawi.

Kum 25 mi forward hian season ṭan dawn khan Chelsea hi Atletico Madrid aṭangin a zawm a, pound maktaduai 44.5 man ni mah se Chelsea boss Enzo Maresca hnuaiah khelhna hmun a chang tam lo.

Thlasik transfer tawp dawn niah khan Milan hi a pan a, Felix chuan, "Tun dinhmunah chuan June thlenga cham turin contract ka nei. Thil thlen dan chu kan la hre zel dawn a, tunah rih chuan club, mipui leh hmunhma engkim hian min tilawm rih hle. Club-in min lawm em em a, kei chauh ni loin, ka chhungte thlengin duat takin min lo lawm," a ti.

Felix chuan sawi zawmin, "Nuam ka ti hle. Mahse, football-ah chuan thil a inthlak danglam thut thut a, engmah a chiang lo. Milan-ah hian cham tura chance ka nei a nih chuan cham ka pawi ti lo," a ti a, nuam a ti rih hle.

Portugal international Felix hian Milan a pan hmain Chelsea tan match 20-ah goal sarih a khung hman a, assist vawi hnih a nei. Milan a pan hnuah match hnih khel tawhin goal khat a khung.

AC Milan hian zanin dar 1:30-ah Champions League knockout playoff an khel dawn a, coach Brian Piske ban hlim Feyenoord an lenchilh ang.