Crystal Palace an tlang

Football knockout tournament upa ber FA Cup fourth round-ah Crystal Palace chuan Doncaster Rovers chu 2-0 in an hneh a, an phu ang ngeiin Palace hian fifth round an inhlangkai.

Thawhṭanni zan khan Eco-Power Stadium-ah Palace hi an lenglut a, League Two khelmualah hian a hmuna entu mi 12,739 an awm - Premier League nen chuan a boruak a danglam hle ang tih a chiang.

Palace tan hian Daniel Munoz chuan Jean-Philippe Mateta thawhrah sengin goal hmahruai a khung a, second half-ah midfielder Justin Devenny chuan an goal hnihna khungin nuamsa angreng takin hnehna an chang a ni.

Crystal Palace manager Oliver Glasner chuan, "Eng inelna pawh ni se hnehna chan hi a pawimawh, kan tan chuan khungpui awlsam an ni lo. Round sang zawk kan lut a, match hautak lehzual kan hmachhawn dawn tih kan hriat a ṭha," tiin a sawi.

FA Cup hi fifth round an khelh dan tur pawh fel a ni tawh - Palace hian Millwall an hmachhawn leh ang. Champion lai Manchester United chuan Premier League team Fulham an mikhual thung ang.