Bul ṭan fuh Iga Swiatek

Iga Swiatek chuan a zawna a vawi li nan Qatar Open nomawi chawi a tum, a match hmasa berah Maria Sakkari chu straight set hmanga hnehin bul a ṭan fuh hle, a match lehpekah chuan Yulia Putintseva leh Linda Noskova inkhela chak zawk a hmachhawn ang.

Doha-a inkhelah Grand Slam vawi nga champion tawh Swiatek hian 6-3, 6-2 in hnehna a chang. Australian Open semifinal-a a chak loh hnua a match hmasa ber niin, a tan chuan result duhawm tak a ni ngei ang tih a sawi theih.

Kum 23 mi Swiatek tan Qatar Open hi hmun nuam a ni, kum 2022 khan second round-ah Viktorija Golubic a hneh a, hemi ṭum hian set a hloh. A hnu lamah chuan set pawh hloh miah loin a champion tlang pawp zel a ni.

Season hmasa khan Swiatek hi thla khat chhung inkhel thei lo tura hrem a ni a, nghawng pawh a nei lian hle - a hnuah inkhel leh mah se tun hma lama a boruak ṭha ang kha a la nei leh lo, ngaiawh tumin a bei mek.

Inkhel dangah Russian nula, seeded 10-na ni bawk Daria Kasatkina chuan Polina Kudermetova chu 6-0, 6-0 in a hneh, hnehna chang tur hian minute 42 bak hun a mamawh lo, a match lehpekah chuan Elina Avanesyan a tum ang.

Player langsar dang zingah Jelena Ostapenko pawh chakin, ani hian Japanese player Aoi Ito-i chu 6-2, 6-1 in a hneh.