ICC Champions Trophy - Ni sarih chiah a awm tawh

Cricket ngainatute nghahhlelh ICC Champions Trophy chu February 19, Nilaini aṭangin Pakistan-ah khelh ṭan a ni dawn. India-in ṭhenawm rama inkhelh an duh avangin inelna hi United Arab Emirates-ah khelh a ni bawk dawn a, Men in Blue match zawng zawng hi Dubai International Cricket Stadium-ah an khel ang.

Champions Trophy-ah hian cricket khel thiam ram pariat an inkhel dawn a, group A-ah Bangladesh, India, New Zealand leh Pakistan te an awm. Group B-ah Afghanistan, Australia, England leh South Africa te an awm thung. Group khat aṭangin pahnih ve vein semifinal an lut ang.

Inelna hi kum 1998 aṭanga neih ṭan a ni a, champion hmasa ber chu South Africa niin an in champion chhawk a ni ber. Australia (2006 leh 2009) leh India (2002 leh 2013) te chauhin vawi hnih nomawi an chawi tawh a; New Zealand, Sri Lanka, West Indies leh Pakistan te vawi khat ṭheuh an champion tawh bawk.

ICC hnuai inelna team ṭha bik Australia chu hliam vangin an buai mek a, champion rinkai zingah an tel pha lo ang. Champion lai Pakistan hi mahni muala khel tur ni mah se an hmelma ber India Dubai-ah an hmachawn a ṭul dawn a, final-ah an intawng a nih pawhin 'home advantage' a awm thei dawn lo.

Rohit Sharma kaihhruai India hi champion rinkai an ni a, Dubai-ah an inbengbel dawn avangin stadium ngaiah an khel char char dawn. Hei bakah hian Men in Blue hi anṭha ve hrim hrim bawk.

India hian England nen ODI series an khel mek a, vawiin tlai dar 1:30 hian Narendra Modi Stadium-ah match thumna an khel dawn. Barabati Stadium, Cuttack-a an inkhelh ṭumin England-in 304 runs siam mah se India-in over 44.3-ah 308/6 runs siamin hnehna an chang a, Rohit Sharma chuan century siamin 119 runs a siam. Chutihrualin India-in nomawi an chawi dawn a nih chuan tun hnaia che ṭha lo Virat Kohli-a'n a theihna a lantir vat a ṭul ang.