Zaninah Europa League Knockout Playoff

Europa League last 16 lut tur zawnna knockout playoff chu zanin hian khelh a ni dawn. Team inlan tur zingah Ajax, Real Sociedad, Porto, AS Roma bakah Turkish club pahnih Fenerbahce leh Galatasaray te an tel.

Hetihlai hian Lazio, Athletic Bilbao, Manchester United, Tottenham Hotspur, Eintracht Frankfurt, Lyon, Olympiakos leh Rangers ten last 16 an lut tawh thung.

Beisei pha lo 2

Champions League nomawi chawi tawhtu Porto leh Italian club ṭha AS Roma te hi league round-ah an che ṭha tawk lo. Portuguese club phei chu 18-naah an awm pha chauh a, Roma hi 15-naah an awm thung.

Porto hian season bul an ṭan ṭhat loh avangin January thla khan an manager Vítor Bruno an ban a, José Tavares-a'n a enkawl lailawk hnuah manager thar Martín Anselmi an la lut.

Argentine manager Anselmi hian Europe inelnaah tawnhriat an la nei ṭha lo a, Primeira Liga-ah match hnih enkawl tawhin an inhnehtawk ve ve. Chutihrualin Europa League group match hnuhnung berah Maccabi Tel Aviv chu 1-0 in an hneh thung.

Porto forward Samu Omorodion chuan inelna hrang hrangah goal 18 a khung tawh a, Spanish forward chuan, "Porto hi inelna kan telna apiangah champion tum ngam tur kan ni. Kan tum hmasak ber chu league round paltlang a ni a, tunah chuan Roma hneh hi kan tum tur a ni. Kan tana a harsat ang thoin Roma tan pawh a harsa dawn," tiin a sawi.

Roma hian manager pahnih Daniele De Rossi leh Ivan Jurić te an ban tawh a, tunah hian Premier League-a Leicester City champion pui tawhtu Claudio Ranieri-a'n a enkawl mek.

Ranieri hnuaiah Roma-in hma an sawn a, nikum Krismas hnu lamah hneh loh tawng tawh lo mah se Serie A-ah pakuana an la ni pha chauh. Europa League nomawi nena season khar an duh ang.

Inkhel dang

Europa League-ah Jose Mourinho enkawl Fenerbahce an la dam a, anni hian Belgian club lar Anderlecht an hmachhawn thung dawn. Boruak siam thiam tak Portuguese manager hian Pathiannia Alanyaspor an hmachhawn hmain fan pakhat chu team bus-ah a chuantir a, a bulah a ṭhuttir.

Inkhelah hian Fernerbahce hi 2-0 in an chak zui a, Mourinho hote hi Anderlecht hmachhawn turin an inpeih. Belgian club hian an match hnuhnung berah Antwerp chu 2-0 in an hneh ve bawk.

Galatasaray erawh kartawp khan an inkhel zo thei lo. Okan Buruk hote hian kartawp khan Adana Demirspor an hmachhawn a, 1-0 a hma an hruai laiin an khingpui lungawi lo hi an chhuak tau.

Turkish club hian AZ Alkmaar an hmachhawn dawn a, heta chak zawk zawk hian Manchester United emaw Tottenham Hotspur emaw an hmachhawn theih avangin an inkhel tur hian ngaihven a hlawh ang.