Penalty-ah Forest an vannei

Beisei phak baka season hmang ṭhatu Nottingham Forest-in Premier League-a an season hman ṭhat chu inelna dangah pawh an chhawm nung zel a, FA Cup fifth round an lut ve leh ta.

Forest hian hnehna chang tur erawhin League One club Exeter City lakah vanneihna an mamawh. Minute 120 chhungin team pahnih hi 2-2 in an inhnehtawk a, penalty-ah 4-2 in Forest an chak hram.

Exeter khelmual St James Park, mi 8,219 lenna khelmualah mualneitu team-in goal an khung hma a, minute ngana lekah Josh Magennis chuan goal hmahruai a khung - Forest hian Ramon Sosa leh Taiwo Awoniyi hmangin an chhanglet.

Mahse, minute 50-naah Magennis chuan khung lehin, 2-2 a ni a, minute 87-naah Exeter player Ed Turns chu hnawhchhuah zui ni mah se, Forest-in goal an khung belh chuang lo. Penalty hmangin chak zawk zawn zui a ni a, 4-2 in Exeter an chak.

Rin loh goal

Exeter khelmualah Forest hi harsa loa chak tura beisei an ni a, coach Nuno Espirito Santo pawhin an ṭhat dan berin player a rem duh lo - kar hmasa lawka 7-0 ngawta Brighton & Hove Albion sawptu team aṭangin Danilo chiahin bul a ṭan nawn.

Mahse, Forest an inring hman lo. Minute ngana lekah Magennis a inlar a, Northern Ireland international striker hian goal hmahruai a khung - Forest an hawihai.

Premier League club hi an insiamrem vat a, Awoniyi chuan a zawnin chance hlauhawm vawi hnih ngawt a rawn nei nghal - a chance neih pakhat phei chu goalline aṭangin Vincent Harper chuan a lo 'clear' hman a, uiawm tak a ni.

Mahse, Forest an hnufual rei lo. Goal an chhuah aṭanga minute 10-na lekah Ramon Sosa chuan Ibrahim Sangare-a pass aṭangin si phurh sutna goal a khung a, 1-1 a ni der.

A goal belh

Forest an phur chhunzawm - Awoniyi a vanduai reng bik lo. Nigerian striker hian minute 37-naah an goal hnihna a khung a, si phur hmasa zawk khan hma an hruai ve leh ta thung.

Goal dang lut loin chawlhlawk hman a ni a, second half-ah rin loh takin Exeter-in goal an khung leh sak! Minute 50-naah goal hmahruai khungtu Magennis chuan si phurh sutna goal a khung leh a, 2-2 a ni.

Forest an talbuai zui. Goal an chhuah aṭanga minute kuanaah hliam vangin keeper Carlos Miguel lak chhuah a ngai a, Mats Sels-a'n a thlak - kum 32 mi keeper hian a hnu lawkah Ilmari Niskanen-a 'shot' chu ṭha zetin a dang.

Forest boss Santo a talbuai a, player ṭha khek reng ṭulin a hre lo - minute 20 a la awm tihin Elliot Anderson leh Morgan Gibbs-White a luhtir a, mahse, goal an hlawh chhuak bik lo.

Forest vanneihna

Minute 87-naah Exeter tana a match hmasa ber kheltu Ed Turns chu hnawhchhuah a ni a, heti chung hian League One club hian chance hlauhawm neih an ṭhulh phah lo.

Set-piece aṭangin Forest an rum ṭhaih reng a, defender Willy-Arnaud Boly-a'n a lo dan hman te, Pat Jones-a shot Sels-a lo dante pawh Forest tan thin tiphutu a tling pha.

EPL club tan hian Jota Silva chuan post a pet per a, bench aṭanga luhtir Chris Wood pawhin goal a keng bik lo. Penalty hmangin chak zawk zawn zui a ni a, Forest an vannei zui.

Forest tana pettu player paliin an pet goal vek laiin, Exeter tan Agnus MacDonald leh Reece Cole ten an hlah a, Nottingham an tlang.