Beiseina neitu Jamshedpur inlan dawn

Zaninah ISL inkhel pakhat a awm dawn - Jamshedpur khelmualah NorthEast United an lenglut dawn a, team pahnih hian beisei an la neih ve ve avangin inkhel hmuhnawm a beisei ngam.

Khalid Jamil-a enkawl Jamshedpur hian table-ah pathumna dinhmun an luah mek a, playoff khel chiang tawh tia sawi ngam la ni lo mah se, match nga khelh tur an la hmabakah an chesual viau a nih loh chuan playoff an khel chiang ang.

Hetihrual hian Men of Steel hian playoff aia sang zawk an beisei a, chu chu direct-a semifinal khelh phak a ni. Chumi tur chuan an hmabak match-ah an chak zel a, FC Goa chetsual an chan tel a ngai dawn - a tawi zawnga sawi chuan zaninah tlawm a thiang lo.

NorthEast United-in table-ah parukna dinhmun an luah mek a, playoff khel phak tur chinah an awm. Top two la beisei thei mah se, thilmak a thlen tel a ngaih tawh avangin an tum ber tur chu playoff khel tura an dinhmun sawh ngheh a ni.

Playoff khel thei china an awm mek avangin an kutah engkim a la innghat a, hetihrual hian Odisha, Kerala Blasters leh Punjab FC te aia an sanna a tam loh avangin vawi khat chetsual a pawi thei - zaninah chak a pawimawh dawn.