Betis hmachhuan Antony

UEFA Europa Conference League knockout playoff chu zanin hian khelh a ni dawn a, Real Betis-in zanin dar 1:30 hian Gent an tlawh dawn. Premier League club Chelsea erawh group stage an khelh ṭhat avangin last 16 an lut tawh thung.

Thlasik bazarah Betis hian Manchester United-a beisei pha lo Antony an la lut a, manager Manuel Pellegrini chuan Brazilian forward chu theihna nei sang tak a nih thu a sawi nghal.

Man City pawh lo enkawl tawhtu Pellegrini hian Antony hi fak satliah loin bul a ṭantir nghal a, Athletic Bilbao nen 2-2 a inhnehtawk ṭumin man of the match-ah an thlang. Kar tawp khan Betis-in Celta Vigo hneh lo mah se Antony-a'n goal hmahruai a khung a, man of the match-ah an thlang leh bawk.

Spanish club hian Antony hi a ngheta lakluh dan an ngaihtuah ṭan der a, zanina Gent an hmachhawn turah pawh hian en bik a ni dawn. Chutihrualin Betis hian Real Madrid player hlui Isco pawh an kawl tih hriat a ṭha.