City boss a nih hnuah a vawi khat nan Guardiola a chak zo lo Celtic Park-ah Manchester City an chelh

Manchester City coach Pep Guardiola-a'n match 10 chhung zet a zawna chak hmel a hmuh hnuah a record duhawm a chhawm nung thei lo a, khualmualah Celtic chu 3-3 in an inhnehtawkpui.

Player class sang leh hlawh tam rual City-in an ngam loh chu rawlthar duhawm Moussa Dembele a ni. Kum 20-a upa for-ward hian minute 2 leh second 23-na lekah Celtic tan goal hmahruai a khung nghal a, Scottish champion tan Champions League-a an goal khung rang ber a ni nghal.

Mualneitu team hian firsthalf-ah vawi hnih zet hma an hruai a, City tan Fernandinho-a'n an si phurh a sut hnuah Raheem Sterling chuan an lamah a ti lut.

Celtic Park-ah fans thawm a ṭha a, player tawnhriat nei tlem tan chuan zam rum rumna tham a ni. Mahse, player hlawh hnem danglamna a lang a, Sterling chuan an lama a tih luh aṭanga minute riatnaah an si phurh sutna goal a khung lehnghal a, a zam duh lo.

Second half-ah Dembele bawk a inlar a, French forward hian bicycle kick ropui hmangin a vawi thum nan Celtic hma a hruaipui. Mikhual team tan Nolito chuan sut ve lehin goal dang a lut tawh lo a, inkhel hmuhnawmah team pa-hnihin point khat ve ve an insem.

Celtic boss Brendan Rodgers chuan, "Chak thei dinhmunah kan ding a, hetihrual hian point khat hlawhchhuah pawh hi thil lawmawm tak a ni tho. Pep pawhin he hmuna inkhelh har-satzia chu a hrechiang tawh ngawt ang. City hi manager ṭha tak hnuaia player ṭha rual khel an ni a, mah se vawi tam kan chhaih mangang thei kha ka nauten fak an phu thlawt a ni," a ti.

Manchester City manager Pep Guardiola chuan, "Kan tan chuan inzirna ṭha tak a ni a, hma taka goal kan chhuah hmasak chuan insiamṭhat a harsa tawh ṭhin. Dik taka sawi chuan goal kan chhuah hma lutuk khan min barakhaih takzet a ni. Goal thum an khung chungin chance an nei tam lo a, keini chuan chak tur khawpin chance kan ngah a ni," tiin chak phu zawkah a inngai.