Bayern-in Atletico ngam lo

Nilaini zan Cham-pions League inkhel ngaihven hlawhah Bayern Munich chuan khualmualah Atletico Madrid an lenchilh a, 1-0 in an tlawm. Carlo Ancelotti-a tan Bayern Munich a enkawl hnua a tlawmna hmasa ber a ni a, Diego Simeone-a'n tun season-ah a naute tlawm hmel a la hmuhpui miah lo thung.

Atletico tan Yannick Carrasco chuan he inkhela goal awmchhun hi a khung a, minute 35-naah goal kil sirah petin Bayern keeper Manuel Neuer tan dan theih a ni lo. Mualneitu team tan Fernando Torres chuan hun ṭha nei mah se post tauh per nan a hmang a, Antoine Griezmann chuan Luis Felipe-a penalty hlawh chhuah hmangin crossbar a pet per bawk.

Bayern tan Franck Ribery-a'n a hun ṭha neih a khawhral hnuah Robert Lewandowski-a'n chance nei ve leh mah se Polish striker hian vengtu nei lo chungin hnai set sawtah a tauh out.

Atletico Madrid coach Diego Simeone chuan, "Atletico enkawltu ka ni hi vannei ka inti takzet a, he team hian kan duhdan anga khelhchhuah zel tumin he club tan hian kan rilru zawng zawng kan pe a ni. Minute 90
chhung ṭha takin kan khel a, Atletico ka enkawl hnua kan match ṭha ber zinga chhiar tel tlak a ni," tiin a sawi.

Bayern Munich boss Carlo Ancelotti chuan, "Game kan thunun a, a pawi ber erawh chak duhna thinlung kan put tawk loh avangin beih hram hramna kan nei lo. Vawi tam ball kan hloh a, kan khel kha a muang em em bawk a ni," tiin a naute khelh danah a lawm lo hle.