Messi tel loin Barca chak

Ṭhal na vangin Lio­nel Messi inlan thei lo mah se Barcelona-in khualmualah Borussia Monchengladbach chu 2-1 in an hneh. Messi awm loh hlanin Spain inter­­national Paco Alca­cer chuan Neymar leh Luis Suarez te kiang­ah inkhel bul ṭan mah se player langsar ber chu Arda Turan a ni.

German club tan Eden Hazard-a unaupa Thorgan Hazard-a'n goal hmahruai a khung hnuah substitute Arda Turan hian an si phurh sutna goal a khung a, Gerard Pique chuan Suarez goal shot per aṭanga ball kal chu an chakna goal ni turin a khung bawk.

Barcelona boss Luis Enrique chuan, "Inkhel pumpui thlirin chak phu zawkin hnehna kan chang a ni. Gladbach khan an khelh ṭhin dan anga khel loin an tawlhhnung a, a hun ṭha neih an chhawr nghal bawk. Mahse, chawlh­lawk zawhah insiamṭhain kan game plan-in hnehna min chanpui a ni," tiin a sawi.