AFC Cup Champion lai inhnehtawkpuitu Bengaluru

I League champion Bengaluru FC-in Indian football-a bung thar kai turin kawng dik an zawh zel - Nilaini zan khan AFC Cup semifinal first leg-ah champion lai Johor Darul Ta’zim chu 1-1 in an inhnehtawkpui a, khualmualah goal hlu tak an khung.

Tan Sri Dato' Hj Hassan Yunos Stadium-a mipui 18,000 pungkhawm hmaah team pahnih an inhlau lo tawn a, inkhel ṭantir lam minute 20 chhung chu an innawr tawn zak zak reng. JDT lamin Azammuddin Akil leh Juan Martin Lucero hmangin hun ṭha nei mah se an chhawr thei lo.

Mualneitu team tan Jorge Pereyra Diaz chuan minute 52-naah goal a khung ta nge nge a, corner aṭanga ball lokal a tauh chu Bengaluru keeper Amrinder Singh chuan a dang hman lo - mahse, Malaysian club lawm chhung a rei lo hle. Goal an khung aṭangin minute li a liam hman chauh tihah Eugeneson Lyngdoh a inlar a, Khasi tlangval hian yard 30 vela hla aṭangin defender hual vel karah kawh pawtin a pet a, goal ropui leh danglam bik a ni.

Team pahnihin goal an khung chhunzawm theih loh avangin goal dang lut loin hun a tawp a, final lut turin away-a goal khungtu Bengaluru dinhmun a ṭha rih zawk.

Bengaluru coach Albert Roca chuan, "He team ka zawm hnuah quarterfinal khel tura inpuahchah turin hun tlemte chauh kan nei a, chutichunga tun dinhmun kan thleng thei hian ka naute min rin tir lehzual a ni. Minute 90 chhung theihtawp chhuaha kan beih avangin inhnehtawk hi kan phu a ni. Second leg khelh tur kan la nei a, final lut tur chuan tun aia nasa zawk hian kan beih a la ngai dawn a ni," tiin an zinkawng a la tawp loh thu a sawi.

India club-in Asia football inelnaah an la thleng thui ngai lo. Kum 2004 AFC Cup-ah khan East Bengal chuan quarterfinal thlengin he dinhmun thleng thei hmasa ber an ni a, kum 2007 khan Mahindra United chuan quarterfinal an khel ve leh bawk.

Kum 2008 khan Dempo chuan semifinal lutin Indian football chanchinah bung thar an ziak a, East Bengal chuan 2013 khan semifinal an lut ve leh bawk. Hun engemaw chen Indian club ten last 16 bak an paltlang theih loh hnuah Bengaluru an lo lang a, tun dinhmunah chuan South Indian club hi final lut turin an dinhmun a ṭha hle.

Tute nge inlan?

Bengaluru: Amrinder Singh (GK), Juan Antonio, John Johnson, Alvaro Rubio, Sunil Chhetri (C), Rino Anto, Eugeneson Lyngdoh (Beikhokhei Beingaichho 90+'), Alwyn George (Vishal Kumar 68'), Salam Ranjan Singh, Cameron Watson, C.K. Vineeth (Daniel Lalhlimpuia 77').