Smith tan Saul 'Canelo' Alvarez a la 'u' hret

Saul 'Canelo' Alvarez chuan boxer ṭha chungchuang bik a ni tih a pholang leh ta a, nimin khan tlawm la nei ngai lo Callum Smith chu a career-a a vawi khat nan tlawm awmzia a temtir. 

Texas, USA-a inhnekah Alvarez hian round 12 tluanin inhnek a thunun a, a kut rang tak, a hnek dan ṭha tak leh defensive game-te chu Smith hian kawng tinrengin a phak lo a ni ber. British boxer hian round 12 a tlin avangin fak erawh a phu a, result an puanah erawh a phu ang ngeiin Alvarez chu 119-109, 119-109 leh 117-111 in judge pathumin chak zawkah an puang vek. 

Alvarez hian hnehna a chan avangin Smith-a kawnghren kawl lai WBA world super-middleweight title chu a chhuhsak a, WBC world super-middleweight title awl lai chu a hlawh chhuak tel bawk. 

Kum 30 mi Callum Smith-a'n Alvarez a hmachhawn hmain fight 27-a hmachhawn a, hnehna a chang vek - heng zinga 19-ah chuan a khingpui a knockout. 

Liverpool khaw tlangval hian Alvarez hmachhawn hi a thil châk ber zinga mi a ni a, mahse, a beisei ang erawhin a awlsam lo - a vawi khat nan a career-ah a tlawm ta zawk. Mahse, Smith chuan a chak lo zawk a ni tih huaisen taka pawmin, "He hmunah hian hnehna chang tura lo kal ka  nih avangin hrehawm ka ti takzet. Chhuanlam siam ka tum lo - a ṭha em a ni," a ti. 

Smith chuan sawi chhunzawmin, "Kha aia ṭha zakw tur kha ka ni a, mahse, a fingin a rem hre em a ni. Thiam takin thang a kam a, chet ve hmain min chet khalh zel bawk si - ka thiam loh vang pawh a ni mahna," a ti a, Mexican boxer-a chungnun zawk thu a pha lo. 

Kum 30 mi Alvarez hi 5 ft 9 in-a sang a ni a, a hmachhawn Callum Smith hi 6 ft 3 in-a sang a ni thung - boxer pahnih insan hleih dan ngaihtuahin tam tak chuan Smith hian chance-a nei veah an ngai. 

Mahse, a ni lo - Alvarez-a'n round hmasa ber aṭangin ngam sarhin Smith a hmachhawn a, hmun awl a insiam thiam a, a chance neihah Smith hnek ṭhelh a tum lo. A tawi zawnga sawi chuan, Mexican boxer hi a thiam a ni. 

Round nganaah ring sira Alvarez-a u te pathum lo ding chu, "A ṭha takzet," tiin an lo au a, hei hian inhnek dinhmun a hrilhfiah -Alvarez-te unau hi pasarih an ni a, boxer vek niin Alvarez hi a naupang ber. 

Alvarez hian round kuanaah na zetin Smith a hnek fuh a, a hnar a thi nasa hle - round 10-na a thlen meuh chuan commentator lam chuan Alvarez hi chak zawkah an lo puang fel der tawh a, Smith huaisen mah se Mexican boxer thiamna a tan chuan a u hret a ni. 

Alvarez hian fight-a hmachhawn tawh vawi 56-ah vawi 53 hnehna a channa a ni a, heng zingah hian vawi hnih a khingpui inhnehtawkpuiin vawi khat chu a tlawm - a ngam loh awmchhun chu Floyd Mayweather a ni. 

Mexican boxer-in hnehna a chan hnu lawkah Billy Joe Saunders chuan Alvarez a lo cho nghal a, British boxer hian WBO super-middleweight title a kawl mek - promoter Eddie Hearn chuan Saunder leh Alvarez an inhnek tur thu a sawi bawk. 

Alvarez chuan, "Ka tana zan duhawm ber zinga mi a ni a, zan ropui tak a ni. Belt dang pawh ka la duh a, tuin nge kawl lam ka ngaihtuah lo a, ka tlanchhe ve ngai lo. Boxer ṭha ber ber ka hmachhawn tawh a, khawvel hmaah fighter ṭha ber ka ni tih ka pholang tawh," a ti a, Gennady Golovkin chu a vawi thum nan a hmachhawn theih tur thu a sawi lang zui. 

Alvarez hian Smith nen an inhnek aṭangin dollar maktaduai 20 vel a hlawh tura ngaih a ni a, Smith hian dollar maktaduai riat aṭanga dollar maktaduai 10 inkar vel a hlawh thung - Covid-19 vangin boxer pahnih hlawh hi a tam tur angin a tam tawk lo.