Saina a dam hnai

Khup hliam vanga chawl mek Saina Nehwal chuan a hliam a dam chhoh mek thu leh thla leh tawp lamah chuan court chhungah a inlan leh theih tawh a beisei thu a sawi chhuak.

2012 London Olympic bronze medalist chuan, "Tun dinhmunah world number 8 ka ni a, ka inkhelh loh rei tak avangin ka tlahniam dawn tih pawh a chiang. Chawlhkar ruk chhung ka inenkawl tawh a, kar nga emaw kar ruk emaw ka inenkawl zui a la ngai dawn bawk," tiin a sawi.

Saina hi Rio Olympic hnu-ah a la inkhel leh rih lo, thla hmasa lawk khan Mumbai hospital-ah a khup zai niin a rang thei ang bera inkhel leh thei tura enkawl mek a ni. A hliam hi August thla tira mi kha ni tawh mah se Rio-ah khan a inlan zui ta tho a, a tawrh phah niin a lang.

Kum 26-a upa Saina chuan, "Min enkawltu Sir H. N. Reliance Foundation Hospital and Research Centre leh Physio Ms Chandan Poddar te chungah ka lawm a, anni hian ngai ka awh leh theih nan theihtawp min chhuahpui a ni," a ti. Hyderabad nula hian Indian badminton-in hma a sawn zel theih nan infiammi naupang tak tak te theihna ti pung turin coach ṭha neih belh a pawimawh thu a sawi tel bawk.