Zanin Dar 7:00 Chanmari Derby - Sanga vs Zara

Chanmari FC-in MPL4 final-ah Aizawl FC an hneh lo a, coach HC Zarzoliana hnuaiah nomawi an chawi loh bawk avangin Dinthar coach hlui thlak nan Bethlehem Vengthlang FC aṭangin an coach hlui Lalsangzuala Hmar an la let.

Sanga hian BVT a enkawl laiin MFA Super Cup champion puiin I Day Football final thleng mah se Zara enkawl Chanmari FC chu a pawimawh ber MPL semifinal-ah a hneh lo. Kumin I Day Football group stage-ah coach pahnih hi an intawng tawh a, Chanmari Derby-ah 1-1 in an inhnehtawk.

Zanin dar 7:00 hian Chan-mari Derby khelh a ni leh dawn a, tun ṭum hi West Warrior-in an veng ṭhenawm Chanmari an hnaih lai ber a nih avangin ṭantu pawh an ṭhahnem ngei ang. Zanin hi MPL match satliah a ni lo - veng leh veng inelna a nih bakah coach ṭha zawk zawnna a ni bawk.

Ven uluk tur Sawmfela

I Day Football-ah Chan-mari FC tan Lalruatfela Zote leh Mal-sawmfela te an khel ṭha a, Chanmari West FC tan R. Lal-danmawia leh Laldampuia an langsar bawk. An inhnehtawk ṭum hian Chanmari tana Fela Zote goal khung chu West War-rior-in Danmawia hmangin an sut.

MPL-ah Chanmari forward pahnih aiin West Warrior winger pahnih an hriam zawk a, Danmawia leh Dampuia goal khung belhkhawm chu goal ruk a ni.

Hetihlai hian Fela Zote-in beisei a pha lo a, Chhinga Veng lama goal khat a khung hnuah inhliam vangin ngai a awh leh tawh lo. Sawmfela'n MPL5-ah goal hnih khung tawh mah se match hnuhnung bera Zo United an khelh ṭumin dah ṭhat ang mai a ni. Fela Zote lah inhliam vangin a khel thei dawn lo.

Chanmari West FC coach HC Zarzoliana chuan, "Sawm-fela hi player ṭha bik a ni. Chanmari FC-ah pawh hian a khelh ṭhat leh ṭhat loh hi a lang hle. Uluk takin kan veng dawn a, ven erawh a harsa ang," tiin a sawi.

Zara hian an veng (Ramhlun South), Chanmari FC leh Mizoram team a hruai ṭumin Sawmfela hi a enkawl tawh a, Mizo tlangval talent nei
ṭha bik hi a hriat chian avangin Zo United leh Ramhlun North lamah goal khung tawh lo mah se ven uluk a tum hle.

Double 'D'

Zara awm hmain Chanmari West star chu Vanlalbiaa Chhangte a ni a, tunah Chanmari FC-ah insawnin khelhna hmun a chang meuh lo. Hetihlai hian West Warrior-in Mabiaa thlakna atana Dampuia leh Danmawia te an lakluh theih avangin MPL5-ah anni aia winger nei
ṭha an awm chuang lo.

Sialhawk leh Kawrtethaw-veng tlangval hi field sir ve ve a tlan chung siin an inkawp rem a, West Warrior goal nawrna ber pahnih hi an hming bula 'D' a awm avangin 'Double D' tih theih an ni. Chanmari FC-in derby-a chak an tum chuan Double D te hi an ven theih a ṭul ang.

Chanmari FC manager Mawitea chuan, "Danmawia hi player ṭha tak a ni a, kan club-a khel turin la duh mah ila kan inrem thei ta lo. Dampuia pawh player ṭha bik a ni a, chuvangin field sir lamah kan fimkhur a ṭul ang. Kan coach-in heng player pahnih dang tur hian ruahmanna ṭha tak a siam ngei ang," tiin Vanglaini palai a hrilh.

Engtin Zel?

Chanmari FC hian match nga khelh tawhah point 11 hmuin Chanmari West aiin point liin an hmu sang zawk.

West Warrior coach Zara chuan, "A sang palia awm theih reng hi kan duh a, Chanmari FC hi kan hneh lo a nih chuan result dang a zirin top 4 aṭangin kan chhuak thei tihna a ni. Tun hnaiah Chanmari an khel ṭha tawk lo a, chutihrualin an player pawimawh MS-a leh Fela Zote ten tel loin an khel tih hriat a ṭha. Min hmachhawn hunah chuan an ṭhat theih ang berin an khel dawn a, keini pawhin chak tumin kan khel ang," tiin a sawi.

Chanmari FC manager Mawitea chuan, "Zanah kan khel leh tawh dawn a, Zirtawpni zana inkhel en hi a rem em em a ni. Chanmari mipui hnen aṭangin
ṭawiawmna ṭha tak kan beisei a, Lammualah player tiphur turin Chanmarians ten thawm ṭha tak an nei ang," tiin an veng mipui inkhel en turin a sawm.

Chanmari West mipui hi an phur thar em em a, zaninah an tlem lo ang. Chanmari pawh Aizawl FC laka an chakna chu an fans an ni - zaninah pawh an team au chak leh an tum ang.