Djokovic a inhnukdawk

Novak Djokovic chu karleha khelh tur China Open-ah a inlan dawn lo. Beijing-a world number 1 inlan theih loh chhan hi a kiu hliam a la dam chian loh vang a ni.

Serbian thiampuipa hian China Open-ah hian hnuhma a nei ṭha hle a, vawi ruk champion tawhin match 29 a khelh tawhah hnehna a la chang fai vek. Kuminah pawh hian champion tura rinkai ber ni mah se September 12 a khelh zawh tak US Open final-a Stan Wawrika a hneh loh hnuah court chhunga kir leh turin a la inpeih tawk lo.

Australian leh French Open nomawi kawl mektu chuan, "China Open ka khel thei lo tur hian min ti lungngai tak zet a ni. Ka kiu na a dam chho mek a, min enkawltute thurawn angin ka dam chian ver vawr hma chu inkhelh rih loh ka tan a ṭha. A rang thei ang bera ATP tour-a rawn kir thei turin ka inenkawl zui ang," a ti. Kum 29-a upa Djokovic hian October 10 aṭanga khelh ṭan tur Shanghai Masters-ah inlan theih a beisei thu a sawi tel bawk.

Grand Slam vawi 17 champion tawh Roger Federer-a'n US Open khelh hmain a tan season a tawp thu a lo sawi tawh. China-ah hian player langsar dang Andy Murray leh Rafael Nadal te erawh an inlan beisei a ni.