A chung bera awmin BVT-in Champhai pan dawn BVT-in hneh loh la tawng lo Chhinga Veng-in Chawnga hnuaiah point la hmu lo

Lalbiaksanga Colney enkawlna hnuaiah Bethlehem Vengthlang FC chu mumang ramah an cheng chhunzawm zel a, Mizoram Premier League table chung bera awm chungin Champhai an pan ang.

Nimin tlai khan BVT-in result ṭha neih tuma coach thar la Chhinga Veng chu mangchhia an neihtir chhunzawm a, injury time minute thumnaa Lalram­muanpuia (Apuia) goal hmangin BS-a hoten hnehna an chang.

Inhliam vanga buaina

Bethlehem Vengthlang FC-in inhliam vangin captain Lalding­ngheta bakah Kolasib tlangval Lalthanzama Fanai te an chhawr thei lo a, damchiang lo chungin Lalrintluanga leh Laldinpuia te luhtir an ni bawk.

Chhinga Veng FC-in forward MS Dawngliana bakah defender pahnih Ronald Zothanzama leh Laldinliana te an la chhawr thei chuang lo a, coach thar Chawngthansanga'n Aizawl FC an hneh loh ṭum aṭangin player pakhat a thlak danglam. Right back Lalthlamuana chu damloh vanga chhawr theih a nih loh avangin 100% fitness la nei lo Dinthangpuia chu dah luh a ni.

Goal tel lo attack

BVT midfielder Zosangkima'n minute lina lekah freekick a pet a, Chhinga Veng keeper thar Isaac Vanlalpeka'n a thiam phochhuah nan a lo hmang.

Kolasib tlangval Isaac-a a inringtawk a, keeper aṭanga ball a sem theih avangin Chhinga Vengin chu inkhel thununtu an ni. Minute 14-na lekah midfielder Isaac Lalremruata'n keeper chauh a hmachhawn hnuah mak takin goal zawnah a pet lo a, Chhinga Veng tlangval tawnhriat neih tlemna a lang -a tawpah an tuar.

Chhinga Veng goal nawr a na zel a, Isaac-a cross chu Khawpui­mawia'n crossbar a tauh per a. Kelkang tlangval hian BVT defender ball clear ṭhat tawk loh vangin chance ṭha dang nei mah se goal zawnah a volley thei lo.

Goal hmaah Chhinga Veng an hlauhawm a, BVT goal nawr a na lo. First half tawp lamah BVT-in chance ṭha a nei a, Zosangkima pass chu Apuia'n goal sirah chiah a pet.

A tawpah BVT vannei

Second half inkhel a nung tawk lo a, Chhinga Veng bawkin chance ṭha an nei hmasa. Winger ṭha H. Lalmuankima'n corner hmang ṭangkai thei loin goal zawnah a pet lo a, midfielder Paul Ramfangzauva ball pet chu BVT defender a per hnuah goal sirah chiah a kal. MPL kaithar vanduai a kal tluang a, BVT defender Dinpuia handball vanga Chhinga Veng penalty beiseina chu referee-in a pe tlat lo!

Hun tawp lamah BVT huaisenna a lang nawn a, coach BS-a'n an striker neih ṭhat ber PC Zosanga chu damkawr chungin a luhtir - draw a duhtawk loa chak ngei a duh. Injury time-ah Chhinga Veng captain Joseph Lalnunpuia fimkhur tawk loh vangin PC Zosanga'n vei lam kil aṭangin ball a lalut a, Lalmawizuala nen wall pass an neih hnuin Apuia tan ball ṭha a pe a, Armed Veng South tlangval hian 'cool' takin chakna goal a khung.

Man of the match a thlan Apuia hian an match hnuhnung bera Dinthar FC an hneh ṭumin injury time-ah goal a lo khung tawh a, Chhinga Veng erawh coach thar Chawnga hnuaia an match hmasa berah injury time-a goal vang thoin Aizawl FC an hneh lo.

Eng nge an sawi?

BVT boss chuan, "Kan vannei a, kan thawkrim tel bawk. Veng chhung mipui ṭawiawmna ṭha tak kan neih avangin ka lawm a, kan result avangin ka lawm tel bawk," tiin a hmel leh ṭawngkamah a lawm tih a chiang hle.

"October thlaah transfer a inhawng dawn a, player pathum vel chu lakluh kan tum ang. Tunah chuan kan squad a pan lutuk a, champion tur khawp player kan nei loin ka hria. Result ṭha kan nei chho zel a, league round tawp thlengin attacking football kan khel ang," tiin an hmachhawp a sawi.

Armed Veng pachal BS-a hian Phase 1 bik attacking football an khelh tur thu a sawi tawh a, tunah chuan league match zawng zawngah an khelh tur thu a sawi tawh - BVT an hmuhnawm zel dawn.

Chhinga Veng coach Chawng­than­sanga chuan, "Kan chance hlah zozai kha a mak zawk a ni. Ka awmna hmun aṭang chuan BVT defender kha a handball ngeia ka hmuh avangin penalty tur a ni a, referee khan min pe se chuan result a danglam ang. Eng pawh nise kan vanduai tih bak sawi tur ka hre lo a, semifinal thlen ngei kan tum avangin rim lehzuala kan thawh a ṭul a ni," tiin a sawi.

Chawnga enkawl team hian match hnihah injury time-ah goal an chhuah a, an chak lo ve ve - vanduai a kal tluang zel.

Tute nge inlan?

Bethlehem VT (4-2-3-1): Malsawmdawngzela; Lalnghinglova, H.Lalhlimpuia, P.C Laldinpuia, Hmingthanmawia; Zosangkima, Lalrintluanga; R.Lalrinsanga (Joseph R. Lalmuanpuia 90+2'), Lalmawizuala, R. Lalrammawia (P.C Zosangliana 69'); Lalrammuanpuia

Chhinga Venga FC (4-2-3-1): Isaac Vanlalpeka; Dinthangpuia, Joseph Lalnunpuia, Vanlalthanga, Lalramfelpuia; Paul Ramfangzauva, Joy Mrona Khar Rawai; Vanlallawma, Isaac Lalremruata (P.C Vanlalhmangaihzuala 73'), H. Lalmuankima (H.Zonunthara 89'); Lalkhawpuimawia