Angelique Kerber leh Venus Williams chak lo

Women’s Tennis Association (WTA) Premier Tournament zinga pakhat Wuhan Open khelh mekah seeded pakhatna Angelique Kerber leh Venus Williams te chu Nilaini khan third round aṭanga vuak thlak an ni.

German nula Kerber hian Petra Kvitova lakah vawi 22 zet break point hmu thei mah se ṭum nga chiah a chhawrṭangkai theih bakah vawi riat ngawt double faults a neih bawk avangin 6-7 (10), 7-5, 6-4 in a chak lo. Australian leh US open nomawi kawl mektu Kerber hi WTA number 1 a nih hnua a chak lohna hmasa ber a ni nghe nghe.

2014 Fed Cup final-ah khan Kvitova hian Kerber hi a lo hneh tawh a, hemi hnuah ṭum thum intawng leh tawhin a chak lo zawkah a ṭang ziah, tun ṭumah erawh result a danglam ta. Quarter-final-ah chuan Carla Suarez Navarro hnehtu Johanna Konta a hmachhawn leh ang.

Champion lai Venus Williams pawhin beisei a phak lo a, a khingpui Svetlana Kuznetsova chuan a service ṭum nga chhuhsakin 6-2, 6-2 in a hneh.

Inkhel dangah Simona Halep chuan inkhel inhnehtawk takah 6-3, 6-3 in Yaroslava Shvedova a hneh. Romanian star hian Daria Kasatkina hnehtu Madison Keys a hmachhawn ve leh thung ang.