Lewy-a'n Bayern a chakpui

FIFA Best Men's Player Award dawngtu Robert Lewandowski chuan Inrinni zan khan goal hnih a khung a, Bayern Munich-in Bayer Leverkusen 2-1 in an hneh. 

Bay Arena-ah Bundes-liga hmahruaitu zawnna neih a ni a, Patrick Schick-a'n minute 14-naah Leverkusen tan goal hmahruai mawi zetin a volley goal. Leverkusen hi hmahruai mektu an ni a, an muala an khelh bawk avangin dinhmun sawhnghehna hun ṭha an nei.

Amaherawhchu Bay-ern-in tun dinhmuna footballer ṭha ber Lewan-dowski an kawl a, Polish striker hi a hunah tak, a hmunah tak a awm a, minute 43-naah siphurh sutna goal a tauh lut. Second half-ah Bayern tan Joshua Kimmich a rawn let a, inhliam vanga nakkuma rawn let chauh tura beisei German player hi beisei aia hmain a dam. Bavarians manager Hansi Flick-a'n huaisen takin Kingsley Coman thlaktu Leroy Sane chu a khelh ṭhat loh avangin a la chhuak leh.

Bavarians-in goal an khung thei lawk lo a, injury time minute thumnaah Lewandowski-a'n player ṭha bik a nih zia pholangin box chhung aṭangin 'cool' zetin chakna goal a khung. Kum 32 mi Lewy chuan, "Ka tih tur ka ti mai a ni," tiin twitter-ah a ziak a, tun season Bundesliga match 12 aṭangin goal 17 a khung der tawh. Bayern hian Leverkusen laka point thum an hlawhchhuah avangin point 30 an hmu a, pakhatna dinhmun an hauh leh tawh. Bundesliga-in thlasik chawlh an nei dawn a, Bayern-in January 3 zanah Mainz an hma-chhawn ang.