Liverpool & goal sarih: Thawnthu a danglam ta

October khan Liverpool chuan duhawm lo takin thawnthu thar an ziak a, Aston Villa khelmualah 7-2 ngawtin an tlawm.

Liverpool hian September 1953-a Arsenal-in 7-1 a Sunderland an ngam loh hnuah champion laiin match khata goal an chhuah hnem ber record an siam. Inrinni zanah Liverpool leh goal sarih sawi zawmna tur a awm leh ta a, tunah erawh thawnthu a danglam ta - Reds hian Crystal Palace chu khualmualah 7-0 ngawtin an sawp a, Premier League table chung bera an dinhmun an sawh nghet chhunzawm zel. 

Liverpool tan Roberto Firmino leh Mohamed Salah chuan goal hnih ve ve an khung a, Takumi Minamino, Sadio Mane leh Jordan Henderson-ten goal khat ṭheuh an khung. 

Champion tura Reds elpui Man-chester City chuan tun hnaia che ṭha Southampton chu Raheem Sterling-a goal hmangin 1-0 in an hneh ve bawk.

Liverpool-in inkhel ṭan aṭanga minute thumna lekah goal hmahruai an khung nghal a, Salah aia bul ṭantu Minamino chuan Mane ball siamsak chu ṭha zetin goal-ah a chantir. 

Japanese forward-in Premier League-a goal a khung hmasak ber a ni a, tun season-ah Liverpool tan inelna hrang hrangah match 15 khelin goal li a khung tling ta a, assist vawi khat a nei bawk. 

Liverpool-in inkhel an thunun zui a, minute 35-naah goal siamsaktu Mane chu goal khungtuah a ṭang a, Roberto Firmino hnen aṭanga a ball hmuh chu Reds goal hnihna ni turin a khung. 

Mane hi Premier League-a tumpui pakhat laka a zawna match sarih chhung goal khung thei palina a ni a, ani hma hian Robin van Persie (8 goals vs Stoke City), Jimmy Floyd Hasselbaink (7 goals vs West Ham) leh Romelu Lukaku (7 goals vs West Ham)-te chuan khingpui pakhat lakah match sarih chhung a zawnin goal an lo khung bawk. 

First half-ah Liverpool-in goal thum an khung hman a, chawlhlawk hman nan minute khat a la awm tihin Firmino chuan an goal thumna hi a khung - Andy Robertson ball pek a ṭhat tluk zetin Firmino chet ranna leh finna hmuh hmaih a thiang lo. 

Chawlhlawk hman a nih hnuah pawh Liverpool-in duhtawk an tum lo a, khung belh zel an duh - captain Henderson chuan minute 52-naah ṭha zetin a khung ve leh a, right back duhawm Trent Alexander-Arnold siamsak a ni. 

Liverpool tan tun season-a goal khung a uar tawk loh avanga sawisel hlawh tak Firmino chuan a tum phawt chuan goal khung lam pawh a ti thei tih pholangin an goal ngana a khung chhunzawm. 

Kum 29 mi striker hian league match 14-a khelha goal nga a khungna a ni ta a, assist vawi thum a nei ta bawk - Tottenham Hotspur lakah khan Firmino hian goal a khung bawk a, a zawnin league match-ah goal a khung ve leh ta. 

Egyptian forward Salah tan chawlh hahdamna hun ṭha tak a ni a, mahse goal khung chaka tuihal reng striker hi Jurgen Klopp chuan Mane thlak turin minute 57-naah bench aṭangin a luhtir. 

Salah hian Firmino goal khung tur a siamsak nghal a, minute 81-naah Arnold-a corner aṭanga ball kal Joel Matip-a tauh chu lo tauh ve lehin goal-ah a chantir bawk.

Minute 84-naah Salah hian a class pholang zuiin Reds goal sarihna chu mawi zetin goal chung kil sirah a thlawh lut a, July-a a inhliam hnua a vawi khat nana inlan  Alex Oxlade-Chamberlain siamsak a ni - Salah hian tun season-ah league match 13 khelin goal 13-a khung tawh a, assist vawi thum a nei bawk. 

Liverpool goal hi Mane, Firmino, Robertson, Alexander-Arnold, Salah, Matip leh Oxlade-Chamberlain-te assist a ni a, Premier League match-a team khat tana player pasarihin assist an neih hmasak ber a ni. 

Jurgen Klopp-a'n season hmasa Premier League-a Liverpool a champion pui avangin FIFA Best Men's coach chawimawina a dawng a, a player-ten goal sarih nen an pu award dawn an lawmsak - tun season-ah champion thei dinhmunah an ding leh mek. 

Reds hian season thum chu a zawnin Krismas laia hmahruaitu dinhmun an luah ta a, 1978-1980 inkara Liverpool vekin English top flight football-a Krismas laia season thum a zawna hma an lo hruai tawh hnua hetiang dinhmun hauh leh thei hmasa ber an ni. 

Mahse, Klopp erawh a ṭawng fimkhur hle. Liverpool coach chuan, "Tun dinhmunah chuan ka hlim ngei a, mahse uchuak taka lawm hun erawh la ni lo. Season a la tawp lo a, match tam tak khelh tur a la awm a ni - mahse, kan inpeih ang," a ti. 

Palace boss Roy Hodgson chuan, "Eng thil lawmawm mah sawi tur a awm lo a, he result avang hian hrehawm kan ti takzet a ni. He team-a player tam zawk hi 7-0 a la tlawm ngai lo an ni a, a êng zawnga thil thlir a harsa takzet," tiin a sawi.