Arsenal-in sum an ren tawh bik lo Mustafi leh Perez an lalut
'Sum hmang hreh' tia sawisel hlawh Arsene Wenger-a'n a zia a thlak! Gunners hian tun nipui transfer chhungin player thar paruk lakluh nan pound maktaduai 100 bawr vel a hmang - Valencia defender Shkodran Mustafi leh Deportivo La Coruna forward Lucas Perez te chu an player thar ber an ni.
Wenger-a'n player thar pa-hnih an neih belh tur thu hi ti chiang tawh mah se a thu mai a la ni a, nimin khan thu chu a taka chantirin 2014 World Champion Germany international Mustafi chu pound maktaduai 35-in an lalut a, striker Perez hi pound maktaduai 17.1 man a ni thung - North London club hian an player thar pahnihte contract rei zawng hi an tarlang lo.
Arsenal hian Perez leh Mustafi te hma hian Granit Xhaka bakah rawlthar pathum Rob Holding, Takuma Asano leh Kelechi Nwakali te an lo lalut tawh a, nipui transfer bazara an sum hman hi pound maktaduai 100 bawr vel niin kum dang nen a inthlau hle. Wenger-a tan sum tam tak senga a lakkhawm a player tharte hi nomawi chawipuitu an nih theih rualin a mualphona belhchhahtu an ni mai thei bawk.
Hei le Mustafi
Kum 24-a upa Mustafi hi Spain-ah kum hnih hun a hman chhungin Valencia tan match 64 a khel hman. Feet 6 a sang defender hian tharum a ngah a, ball kangah a chhawr tlak hle bawk. Euro 2016-ah pawh khan ram tan inlanin Germany goal hmasa ber kha a tauh luh a ni nghe nghe.
Gunners tlar hnungah Laurent Koscielny nena inkawp tur an ni ang a, captain Per Mertesacker leh Gabriel Paulista te tan khelmuala hmun chang tur chuan an thawhrim a ngaih phah khawp ang.
A defender chungchang sawiin Wenger chuan, "Mustafi hian awmna hmun tur a thlang thiam a, hma thlir a nei thui bawk. A kum a la tam lo nachungin tawnhriat a nei tam tawh a, player ropui a ni tawh a - nakina ṭhat belh zel tur a ni bawk," tiin a sawi.
Tlar hma ti chak tur
Olivier Giroud hi striker palian leh goal khung thei ve tawk tak ni mah se hun pawimawhah beisei a phak loh fo bakah inhliam thei a ni. Ani nena inela tura an lakluh Perez hi kum 27-a upa a ni tawh a, a vanglai tak a ni.
Perez hian season hmasa khan Deportivo La Coruna tan inelna hrang hrangah goal 19 a khung a, heng zinga 17 hi La Liga-ah niin league-ah hian a zawnin match sarih chhung goal sarih a khung nghe nghe - Brazilian striker Bebeto record lo siam tawh a tluk. Tun season-a an match hmasa bera Eibar an hmachhawn ṭum pawhin goal a khung bawk.
Wenger chuan, "Perez hi goal khungtu chauh a ni lo a, ṭhiante nena ball inpek kual a thiam bawk. Goal hmaah a thluak a hmang thiam a, rilru fim a hmang thei bawk - chak tak taka ball tlanpui thei a nih avangin kan team tana khel tur chi a ni," tiin a sawi.
Chambers a chhuak
Player pahnih an lakluh laiin Arsenal hian an defender Calum Chambers chu Middlesbrough lamah season khat chhung atan loan-in an chhuah tir. Kum 21-a upa Chambers hian 2014 khan Gunners hi pound maktaduai 16-in a zawm a, senior team-ah hmun chang nghalin England tan pawh ṭum thum a inlan nghal.
Mahse, season hmasa khan beisei phak loin league match 12 chiah a khel a, tunah defender ṭha zawk nia ngaih an lakluh leh tak avangin a inkhelh tam theihna tur hmun nia ngaih Boro an pantir.
Premier League kai thar Boro hian tun nipui chhungin palyer thar 11 an lalut tawh a, heng zingah hian Chambers bakah goalkeeper Victor Valdes, striker Alvaro Negredo leh midfielder Marten de Roon te hi a langsar an ni.