US Open Ana Ivanovic a tla nghal

World number 1 hlui Ana Ivanovic chu US Open 2016-a a match hmasa berah Denisa Allertova hneh loin a tla nghal. Serbian nula hi darkar khat leh minute 11 chhung lekin 7-6 (7/4), 6-1 in a chak lo.

French Open cham-pion hlui Ivanovic hi tun hnaiah a khel ṭha lo hle a, Wimbledon, Olympic leh Cincinnati-ah te a match hmasa berah a chak lo nghal vek.

Kum 28-a upa Ivano-vic chuan, "Inelna ṭha taka ka hmachhawn theih nan ka thawkrim hle a, hetiang result hi ka neih nghal mai ka beisei bik lo. Tun ṭum hi hun harsa ka tawn vawi khatna a ni lo a, chawlh lam phei chu ka la ngaihtuah lo," a ti.

Serena nge nge

World number 1 Se-rena Williams-i'n a dar na vangin US Open 2016 atan inbuatsaihna nei ṭha lo mah se inelna takah a dam hman tih a lantir a, a match hmasa berah Ekaterina Makarova chu straight set-in a hneh.

Thawhlehni zana in-khelah khawtual nula Serena hian world number 29 Makarova chu darkar khat leh minute hnih chhung-in 6-3, 6-3 in a hneh.

Kum 34-a upa Serena chuan, "Zawi zawiin ka dam chho ve zel a, nitin hian hma ka sawn em tih ka inngaichang reng a ni. New York mipui hmaa inkhelh hi a nuam a, he hmun hi chu ka ngaina a ni," a ti. Wimbledon nomawi a chawi hnuah Serena hian match thum chiah a la khel.

American star hian US Open nomawi hi ṭum ruk ngawt a chawi tawh a, major tournament-a a title 23-na tur a beisei mek a ni.

Inkhel dangah Venus Williams chuan vawi 63 zet unforced errors nei chungin Ukraine nula Kateryna Kozlova chu 6-2, 5-7, 6-4 in a hneh. Hmei-chhe singles-a player beisei awm dang seeded palina Agnieszka Radwanska leh seeded pangana Simona Halep te pawhin harsatna nei loin first round an paltlang ve bawk.