World record nen England an chak

England chuan One day international match-a run siam hnem ber record run 444 siam chungin Pakistan chu Thawhlehni zan khan run 169-in an sawp a, ODI series match nga khelh turah vawi thum hnehna chang tawhin series an la chiang tawh.

Sri Lanka chuan kum 2006 khan Netherlands lakah run 443 siama mi pakua hlohin record an lo siam tawh a, kum sawm chhung zet lo ding tawh record hi England chuan run khatin an rawn khum ta a ni - England hian ODI-a Pakistan an hmachhawn hnuhnung 12-ah vawi 11 hnehna changin an ngam hle.

Trent Bridge-a inkhelah England an bat hmasa zawk a, over 50-ah run 444 siamin mi pathum chiah an hloh! England tan opener Jason Roy chu run 15 a vaw chhuak hman chauh tihin out nghal mah se a din chhuahpui Alex Hales-a'n hma taka khelmual chhuahsan a tum ve lo - kum 27-a upa batsman hian ball 122 a hmachhawn aṭangin run 171 a vaw chhuak a, Pakistan player-te a tlan kualtir nasa hle.

Joe Root-a'n Alex Hales-a thlawp ṭha a, bawll 86 a hma-chhawn-ah run 85 tehmeuh a vaw chhuak ve bawk. Jos Buttler chuan England tana half century siam rang ber dinhmun luah turin ball 22 hmachhawn chiah a mamawh a, a tawp thlenga damin ball 51-ah run 90 a vaw chhuak.

Captain Eoin Morgan-a'n khelmual a luhin England run siam zat chu chakpui tham ni tawh mah se duhtawk mai a tum bik lo. Kum 29-a upa batsman hi over tawp thleng damin ball 27 a hmachhawn hman a, run 57 zet a vaw chhuak hman tho a ni.

Pakistan tan chak turin ball 300-ah run 445 siam a ngai a, huphurhawm tak a ni. Opener Sami Aslam chuan run riat a tlin hman chauh tihin a out nghal a, a dinchhuahpui Sharjeel Khan-a'n run 58 siamin a tawp bera lut Mohammad Amir-a'n run 58 tho rawn tlin ve mah se Pakistan-in England laka an target an tlin ngang lo - over 42.4-ah run 275 chiah siamin an vaiin an out vek a, an mualpho chiang hle.

England bowler zingah Chris Woakes a che ṭha hle a, kum 27-a upa fast bowler hian over 5.4-a vawmah run 41 chiah pein wicket li a la a, Pakistan batsman-te che ṭha tur dangtu a ni.