Leicester City-ah Slimani?

Tukin zing dar 3:30 khan England chhunga football transfer hun chu a tawp a, Premier League club-te pawisa hman zat hi tluklehdingawn khat a tlin ngei a rinawm.

Club zawng zawngin club transfer-ah record an siam ta emaw tih mai tur a ni a, he thu i chhiar meuh chuan eng-kim a chiang tawh ang. Season liam taa champion Leicester City leh Sporting Lisbon te chu Islam Slimani chungchangah an inrem tawha ngaih a ni. Algerian striker man hi pound maktaduai 29 bawr vel a nih dawn avangin Foxes player manto ber a ni thei ang.

Sunderland-in Lorient midfielder Didier Ndong chu pound maktaduai 17 in an lalut dawn tih thawm a awm a, hei pawh hi a hlawhtlin chuan club record tur tho a ni. France-in Moussa Sissoko chu transfer chungchanga ṭul ang tihfel turin chhuah an phal sak a, Newcastle United-in an player manah pound maktaduai 30 an chhiar a, Tottenham lamin pound maktaduai 25-a lakluh theih an beisei thung. Kum 27-a upa Sissoko hian Spurs a zawm a nih chuan tun nipui transfer-a Tottenham player manto ber Ghana forward Andre Ayew ( £20.5m) aiin a to zawk dawn tihna ni.

Tun nipui transfer-ah uchuak taka sum an sen rualin loan hmanga player chhuahtir an tam bawk. Manchester City keeper Joe Hart-a'n Serie A club Torino chu loan-in a zawm tawh a, player langsar chhuak tur an la awm bawk. French midfielder Samir Nasri-a'n Turkish club Besiktas a zawm hmel loh tih kan hre hman a, amaherawhchu Nasri hi City-ah a cham kher lo ang. Champions League khel tur Sevilla nen sawi zawm a ni.

Crystal Palace leh Bournemouth ten Arsenal midfielder Jack Wilshere an inchuh mek laiin Serie A club Roma an rawn lang a, English midfielder duhtlanna kan hre hman lo.