Inter Milan-ah Gabigol a lut

Serie A club Inter Milan chuan Santos striker Gabriel Barbosa chu season nga chhung an hnena khel turin an lalut a, a man zat hi puanzar ni lo mah se pound maktaduai 23 bawr vel ni tura ngaih a ni.

Brazilian rawlthar duhawm hi Leicester City leh Chelsea nen pawh sawi-zawm an lo ni tawh a, mah se Olympic neih zawh taka gold dawngtu Brazil football team striker hian Italy lam pan a thlang ta zawk.

Kum 20-a upa striker hian Santos-ah season nga khel tawhin inelna hrang hranga vawi 153 a inlanah goal 56 a khung tawh a, Brazil senior team tan match li a inlanah goal hnih a khung tawh bawk.

'The Next Neymar' tia a hming an phuah Gabigol hma hian Italian club hian Portugal midfielder Joao Mario chu Sporting Lisbon aṭangin pound maktaduai 38.4-in an lo lalut tawh bawk a ni.