World Cup qualifier Asia khawmualpui tan hmunruak pali
2018 FIFA World Cup Russia-a khelh tur zawnna khawmualpui hrang hrangten an nei mek a, zanin aṭangin Asia khawmualpui aiawh tur zawnna neih ṭan a ni leh dawn. Asia-in World Cup-ah hmun ruak pali an nei chiang sa a, inter-confederation playoff hmangin team pakhat dang thawh theihna remchang a awm nghal dawn bawk.
Asian Football Confede-ration hnuaiah ram 46 an awm a, first round aṭangin inelna hi neih ṭan a ni. First round-ah hian AFC ranking-a 35-na aṭanga 46-na ram te an inel a, hetaṭang hian ram parukin second round an lut. Second round-ah hian AFC ranking-a 1-na aṭanga 34-na te awm sain first round aṭanga inpet kai team parukin team 34 hi an zawm ve leh.
India chu AFC ranking-ah 35-na an nih avangin first round aṭanga an inlan a ṭul a, Nepal an hneh hnuah second round an lut. Second round-ah team 40 awmin group pariatah ṭhen an ni a, group khatah team panga zel awmin group tina hmahruaitu ṭheuh bakah pahnihna zinga point hmu sang pali nen an vaiin team 12 (Iran, Australia, South Korea, Japan, Saudi Arabia, Uzbekistan, United Arab Emi-rates, China PR, Qatar, Iraq, Syria, Thailand) third round an lut.
Engtin zel?
Third round-a team 12 hi Group A leh B-ah ṭhen an ni a, group pakhatah team paruk ve ve an awm. An inkhelh kual vek hnuah group-a pakhatna leh pahnihna hi Russia rama 2018 FIFA World Cup khel turin an tling chiang ang.
Group A leh B-a pathumna tan beisei a la bo mai dawn lo. Inter-confederation play-off hmanga World Cup khelh theih dan a la awm. Pathumna team pahnih hi inter-confederation play-off a hmun ruak inchuhin an inhmachhawn leh ang a, he inkhela chak zawk zawk hian CONCACAF-a palina hmachhawnin hnehna an chang a nih chuan 2018 World Cup an khel thei dawn a ni.
Player langsar
AFC World Cup Qualifier-a inlan zingah khawvel huap pawha player langsar ni phak an awm nual a, Everton midfielder hlui Tim Cahill chu kum 36 laia upa ni tawh mah se khelmual chhungah a upatnain nghawng ala nei thui lo niin a lang - Australia thiampuipa hian qualifier-ah goal riat a khung der tawh.
AC Milan midfielder Kei-suke Honda-a'n qualifier-ah Japan tan goal ruk a khung tawh a, a Japanese player pui langsar zingah Borussia Dortmund midfielder Shinji Kagawa chuan goal nga khung tawhin Leicester City forward Shinji Okazaki chuan goal li a khung tawh bawk. Japan hi 2018 World Cup khel tura inpetkai ngei tura beisei zinga mi an ni.
South Korea tan Tottenham Hotspur forward Son Heung-min bawk a langsar a, Bayer Lever-kusen tan pawha lo khel tawh Son hian goal ruk a khung tawh. South Korea tan hian Swansea City midfielder Ki Sung-yueng, Augsburg midfielder Koo Ja-cheol, Ajax leh Porto striker hlui Suk Hyun-jun te chuan goal hnih ṭheuh an khung tawh bawk.
Hriat ngai loh Mohammad
Asia khawmualpuia player langsar tak tak kara quali-fier-a goal khung hnem ber erawh Saudi Arabia striker Mohammad Al-Sahlawi a ni a, goal 14 a khung tawh! Kum 29-a upa striker hian kum 2009 khan Saudi club Al-Qadisiya aṭangin Al-Nassr chu pound maktaduai 6.11 in a zawm a, Saudi Arabia football chanchina player manto ber a ni.
Europe lama kan la hmuh loh striker hian a man a phu zia pholangin Al-Nassr tan vawi 136 inlanah goal 109 a khung tawh a, Saudi Arabia nena group khata awm Japan leh Australia tan ram tan match 24 a inlana goal 24 khung tawh striker hi ngaihthah mai chi a ni lo ang.
AFC World Cup qualifier-a goal khung hnem pahnihna pawh Europe lama kan la hmelhriat loh UAE striker Ahmed Khalil a ni. Kum 2008-a Asian Young Footballer of the Year hian goal 11 khung tawhin UAE club ṭha Al Ahli tan a khel mek a, Tim Cahill ang thoa goal riat khungtu China striker Yang Xu chu Australia striker nen hian pathumna niin Chinese Super League club Shandong Luneng tan a khel mek.
Vawiin Inkhel Tur
Australia 4:00 PM Iraq
Japan 4:05 PM UAE
Korea Republic 4:30 PM China PR
Uzbekistan 8:30 PM Syria
Iran 10:00 PM Qatar
Saudi Arabia 11:00 PM Thailand
September 6, Thawhlehni Zan
Iraq 4:30 PM Saudi Arabia
China PR 5:05 PM Iran
Syria 5:30 PM Korea Republic
Thailand 5:45 PM Japan
UAE 9:00 PM Australia
Qatar 9:30 PM Uzbekistan
Group A : China PR, Iran, Korea Republic,
Qatar, Syria, Uzbekistan
Group B : Australia, Iraq, Japan,
Saudi Arabia, Thailand, UAE