Barca faktu Guardiola

Manchester City mana-ger Pep Guardiola chuan khawvelah Barcelona aia football khel ṭha leh hmuhnawm an awm loh thu a sawi chhuak. Spanish manager hian Champions League group stage-a a hmachhawn tur Catalan hi a fak tak tak nge an rilru a lo ti phawklek lawk tih hriatthiam a harsa.

Guardiola hian inelna zawng zawnga a champion pui vek hnuah 2011-12 season zawh rual khan Barcelona hi a chhuahsan a - German club lian Bayern Munich a zawm.

Bayern a enkawl hnu hian a club hlui hi Champions League-ah hmachhawn lehin inkhelh pahnih belhkhawmin 5-3 in a hneh lo, kuminah Man City enkawl chungin a club hlui a hmachhawn leh dawn.

Guardiola hian 'MSN' tia an sawi ṭhin Lionel Messi, Luis Suarez leh Neymar te hlauhawm zia a hai lo a, Champions League group stage an khelh ṭan hma hauha ṭangkawm hmanga thawm a lo nei lawk pawh hi a mak hran lo.

Kum 45-a upa Guardiola chuan, "Club hlui hmachhawn hun hi a lo thleng dawn tih chu hriat sa a ni, anni hi khawvela team ṭha ber an ni a, kan tan fiahna ṭha tak a ni ang. An tlar hmaa player pathum te hi khingpuite chhaih mangang thei an ni," a ti.

Guardiola chuan sawi chhunzawmin, "Nou Camp-a ka kir leh thei tur hi ka lawm a, ṭhian hluite nen inhmuh lehna hun ṭha a ni. Bul ṭan mek kan nih avangin tihsual kan la nei thei a, hei erawh kan hriat a ṭul - quarterfinal a la ni lo," tiin knockout round thlen hma chuan tihsual in siamṭhatna hun a awm thu a sawi.